Posted by کابل:- د جمهوری ریاست د خبرپاڼې پر اساس، جمهور رئیس حامد کرزي د غزني د ولایتي شورا د رئیس قاضي صاحب شاه وژنه په کلکه وغندله.
د غزني ولایت د چارواکو د معلوماتو له مخې، د افغانستان د خلکو دښمنانو پرون مازدیګر غزني ښار ته څېرمه په نوآباد سیمه کې ددغه ولایت د ولایتي شورا پر رئیس قاضي صاحب شاه تروریستي برید ترسره کړ چې له امله یې ښاغلی صاحب شاه او د هغه د عمه زوی شهیدان شول.
د افغانستان د اسلامي جمهوریت جمهور رئیس حامد کرزی چې اوس مهال د ناپېیلو هېوادونو د غورځنګ د مشرانو په غونډه کې د ګډون په موخه ایران ته تللی دی، دا پېښه په کلکه وغندله او تر سره کوونکي یې د افغانستان د سوکالۍ او آرامۍ دښمنان وبلل.
حامد کرزي زیاته کړه: د افغانستان د خلکو دښمنان ددغو تروریستي بریدونو په ترسره کولو سره غواړي د افغانستان د هغو مشرانو او مخورو چې د هېواد د سولې او پرمختګ لپاره هلې ځلې کوي، رول کمزوری کړي، خو باید پوه شي چې دوی به خپلو شومو موخو ته ونه رسیږي.
د افغانستان د اسلامي جمهوریت جمهور رئیس حامد کرزی د غزني د ولایتي شورا د رئیس پر وژل کېدو خواشینی شوی دی، د خپلې ژورې خواخوږۍ او ډاډګیرنې مراتب د هغه کورنۍ ته وړاندې کوي او دوی ته د لوی خدای (ج) له دربار څخه د فردوس جنت هیله کوي.