خوست ښار : د خوست ولایت مقام په یوه خبرپاڼه کې وایی د نیکمرغه کوچني اختر په لومړی مبارکه ورځ د ځان وژونکي بريد د ترسره کولو لپاره وسله والو مخالفينو د چاوديدونکو توکو ډک وسکټ د خوست مرکزي لوی جامع جومات ته د ننه کړی و ، ترڅو د اختر په لمانځ کې چاودنه ورکړي .

دغه مرکزي جامع جومات ته چې د اختر د لمانځه د ادا کولو لپاره په زرګونو کسانو سربیره د خوست ولايت مقام مشرتابه ، د ملکي او نظامي ارګانونو مسئولين ، د خوست ولايت مخور مشران او دينې علماکرام راځي ، وسله والو مخالفينو داځل د کوچني اختر په لومړی ورځ د دوی د له منځه وړلو په خاطر پلان درلود .

د خوست امنيتي چارواکي وايي ، د نظامي ارګانونو د ګډې جلسې په پايله کې د اختر د ښه لمانځلو او د امنيتي وضعې د لا ښه والي په خاطر يې لازم امنيتي تدابير د وړاندې نيولي دي ترڅو ورانکاري پدې ونه توانيږي چې په دې سرحدي ولايت کې ناوړه عمل ترسره کړي .

دوی زياتوي ، نظامي ارګانونه په مشترکه توګه د خوست په مرکز او ولسواليو کې د څو ورځو راهيسې په پرلپسې ډول د شپې او ورځې لخوا ګرځنده ګزمې او لازمې پلټنې کوي چې د همدې هلو ځلو په پايله کې د اختر په لومړی ورځ د اختر لمانځه د اداکولو څخه وړاندې امنيتي ځواکونو هغه د چاوديدونکو توکو ډک وسکټ کشف او ترلاسه کړ چې د خوست ښار په مرکزي جامع جومات ته د اختر څخه وړاندې يې د ننه کړی و .

خوست والي ښاغلي عبدالجبار نعيمي د وسله والو کسانو دغه ناروا عمل وغنده او وويل چې دغه وسکټ له اختر څخه د مخه د ښار لوی جامع جومات د نامالومو کسانو له لوري ننوېستل شوی و که چيرې د اختر د لمانځه پر مهال ځان وژونکی بريد ترسره شوی وای نو په سلګونو افغانانو ته پکې درانه مرګ ژوبله اوښتي وای .

ده وويل ، امنيتي ارګانونه چې د خلکو د ژوند د خونديتوب مسئوليت يې په غاړه اخيستی او تل پدې مقدسه لار کې قرباني ورکوي ، دوی پدې وتوانيدل چې د دغه ناوړه او شيطاني عمل مخه ونيسي ..

ښاغلي عبدالجبار نعيمي زياتوله ، هغه کسان چې دا ډول عمل ترسره کوي ، د افغانستان او افغانانو سره په لوی لاس دښمني کوي نو دوی بايد د سولې ملی پروسې له لارې د خپلو افغان مسلمانانو ورڼو سره يوځای شي او د وروری ژوند ته دوام ورکړي .

والي عبدالجبار نعيمي وويل ، د کوچني اختر ورځې د ترحم او بښنې ورځې دي نو ټول هېوادوال بايد خپل منځي ستونزو ته د پای ټکی کيږدي او نور د پرديو په لمسون د خپلو وروڼو د وژلو لاس واخلي او هغه کسان چې دغه عملونه کې لاس لري او يا يې په خپله ترسره کوي د افغانيت او مسلمانی سره خلاف دي ..

د يادولو وړ ده ، دغه وسکټ چې زياټ چاوديدونکي توکي پکې ځای شوي وو د جومات د احاطې په داخل کې په يوه تشناب کې د بريد ترسره کولو په موخه ايښودل شوې و چې امنيتي ځواکو لخوا کشف او وروسته په مېړانه سره د نظامي ارګانونو له لوري ، پرته د کوم مالي او ځاني زيان اړولو خنثی کړ خو تردې مهاله امنيتي ځواکونو يې په تور څوک ندي نيول شوي او په اړه يې جدي پلټنې روانې دي .