Posted by کابل:- جمهوررئیس حامدکرزي هغه تروریستي برید په کلکه وغانده چې د کندهار په ولايت کې د یو شمېر بيګناه ملکي وګړو د مرګ ژوبلې سبب شو.
د کندهار د والي د دفتر د معلوماتوله مخې، نن سهار د کندهار ښار په لویدیځ کې د باغ پل په سیمه کې د افغانستان د خلکو د دښمنانو لخوا په یوې کراچۍ کې د ځای پرځای شویو چاودیدونکو توکو د چاودنې له امله څلورتنه ملکي وګړي و وژل شول او شاوخوا دوه ویشت تنه نور ټپیان شول.
د افغانستان د اسلامي جمهوريت جمهوررئیس حامدکرزي د روژې په دغه مبارکه میاشت کې د عامو ملکي وګړو په نخښه کول او د ټولو اسلامي او انساني اصولو پرخلاف د هغوی وینه تویول له اسلام سره دښمني وبلله او د دا ډول ناروا عملونو ترسره کوونکي یې د اسلام دښمنان وبلل.
حامدکرزی د دغه تروریستي برید د قربانیانو کورنیو ته د خپلې ژورې خواخوږۍ او ډاډګیرنې مراتب وړاندې کوي او ټبیانو ته د لوی خدای له دربار څخه د سملاسي روغتیا هیله کوي.