خوست: د خوست ولایت مقام مطبوعاتی دفتر خبر ورکړ چې بیا هم د ۹۹ کوډ څخه دیو شمیر شهیدانو او ټپیانو پر کورنیو نغدي مرسته ووېشل شوه

په خوست کې ۴۸هغو کورنیو ته د ۹۹ کوډ څخه منظوره شوي نغدي مرسته ووېشل شوه ، چې د کورنۍ غړي یې په ځانمرګو بریدونو ، ماین چاودنو او په ورته بڼه نورو تروریستي بریدونو  قرباني شوي وو.

په همدې موخه جوړ شوي مراسم د پاک قرآن د مبارکو ایتونو په تلاوت سره پیل شول .ورپسې دولایت مقام  مرستیال عبدلواحدپټان په خپلو لنډو خبرو کې د شهیدانو او ټپیانو او په پېښو کې د ژوبل شویو کسانو د کورنیو غړیو سره غمشریکي وښودله.

ده وویل دولت هڅه کوي ، په ګران افغانستان کې دویر ټغر ټول کړي ، د خلکو د سوکالۍ او پرمختګ لپاهر یې هڅې پیل کړي، چې په همدې خاطر یې د سولې ملي پخلاینې پروسه پیل کړي ده ، نو په کار ده ، چې د همدې پروسې سره ټول قشرونه په ګډه همکاري وکړي .

ښاغلي پټان د ناستې له برخوالو وغوښتل ،چې په خپلو کې یووالی او اتفاق وساتي او په خپلو سیمو کې هغو کسانو ته چې په ولس وژنه یې لاس پورې کړی ، ځای ورنه کړي.چې په دې سره کیدای شي، د بې ګناه افغانانو د هر ډول ځورونو مخه ونیول شي .

د مقام مرستیال د شهیدانواوپه پیښو کې د ژوبل شویو کسانو د کورنیو له غړو غوښتنه وکړه ، چې خپل اولادونه د علم او حرفوي زده کړو لور ته وهڅوي،ترڅو په راتلونکي کې د خپلې کورنۍ مسوولیت پرته له کومو ستونزو په ښه شان سره سرته ورسوي .

د خوست د ولایت مقام مرستیال عبدلواحدپټان  دا هم وویل ، دغه پیسې لا د وړاندې د ولایتي ادارې په هڅو منظورې شوي وې ، خو په خپل وخت سره  د یادو کورنیو نه حاضرېدل یې د ځنډ لامل شول .نوموړي غوښتنه وکړه ،چې د ولایت له لوري د راډیود اعلان وروسته سمدلاسه ټول مستحقین  له ټاکل شوي معیار سره حاضر او خپله نغدي مرسته ترلاسه کړي .

له هغې وروسته د شهیدانو او په پیښو کې د ژوبل شویو کسانو په استازیتوب واردالدین  په خپلو خبروکې د دولت د وسلوالو مخالفینو وغوښتل ، چې نور د بې ګناه افغانان په وینو نه لمبوي  ،ترڅو په خپل هیواد کې  په ارامه فضا کې ژوند وکړي .

نوموړي له ولسمشر حامدکرزي هم مننه وکړه ،چې د خپلو ولسونو سره د ستونزو او مصیبتونو پر وخت مرسته کوي او دغه مرسته یې د خپل ولس سره د ژورې خواخوږۍ معنا لري .

د یادولو وړ ده،چې د ۹۹ کوډ څخه منظوره شوي ( درې ملیونه ، یو لک پنځوس زره )افغانۍ مرسته د ۱۵شهیدانو او ۳۳ټپیانو کورنیو ته د ټاکل شوي کمیسیون په وړاندې ووېشل شوه ، چې د هر شهید کورنۍ ته یو لک او د ژوبل شوي کس کورنۍ ته پنځوس زره افغانۍ ورکړل شوې .