:                

كابل: ملګري ملتونه او اروپايي ټولنه وايي چې د افغانستان د راتلونکو ولسمشريزو ټاکنو د امنيت په موخه به يو شمېر پوليسو ته ځانګړې روزنه ورکړي .

د دغه پروگرام له مخې به شاوخوا ٣٥٠ پوليس افسران وروزل شي، چې وروسته به بيا په دغه برخه کې د روزونکي په توگه دنده پرمخ وړي .

دغه پروگرام چې د ملگرو ملتونو د پراختيايي ادارې يو ان ډي پي او اروپايي ټولنې د پوليسو پر مټ پرمخ ځي، افغان پوليسو ته به په کې د کانديدانو، رايه اچوږنکو او د ټاکنو د کارکوونکو د امنيت ساتنې په اړه ځانگړې روزنې ورکړل شي .

د رايې اچونې مرکزونو ته د رايو د صندوقونو لېږدونه، او د رايي شمېرنې مرکزونو ته د همدغو صندوقونه بېرته سپارل، د دغه روزنيز پروگرام نورې موضوعگانې دي چې پوليسو ته به يې په اړه لارښوونې و شي .

د پروگرام چلوونکو د افغان پوليسو د لا ښه پوهاوي لپاره د انتخاباتو د امنيت ساتنې په تړاو يو شمېر جيبي لارښود کتابونه هم چاپ کړي دي .

په دغو کتابونو کې يو شمېر تصويرونه چاپ شوي چې په کې په لنډو او روښانه ټکو کې د ټاکنو په اړه لارښوونې ليکل شوي چې کومو پوليسو چې ډېر لوست هم نه وى کړى، پرې پوهېدى شي .

د دې ترڅنگ د پروگرام گډونوالو ته به د اساسي او انتخاباتو د قانون په اړه هم زده کړې ورکړل شي .

د افغانستان د کورنيو چارو وزارت د ښوونې او روزنې مشر گل نبي احمدز ى وايي چې دغه پروگرام ته يې د افغانستان له يو شمېر بېلابېلو ولايتونو نه پوليس افسران راغوښتي دي :

((دغه ٣٥٠ پوليس اصلاً د رايو ورکولو د مرکزونو تر تثبيت وروسته ټاکل شوي دي . په دې مانا چې موږ به په ټولو ولايتونو کې د رايو اچولو ٣٥٠ مرکزونه لرو، دغه افسران به د مسلکي پوهې ترڅنګ له وضعيت څخه باخبره او د ټاکنو په اړه به لازم معلومات لري . له دوی نه به هر يو سل نور پوليس روزي ))

د کورنيو چارو وزارت وايي چې د افغان پوځ او پوليسو ترڅنگ به په افغانستان کې يو شمېر مېشت بهرني سرتېري هم د ټاکنو په امنيت ساتنه کې ونډه ولري