په سيمه كې د مسعود له مخالفو قومندانانو سره هم خبرې اترې روانې دي  

  

رسنى+ويسا: د پاكستان رسنيو ددغه د پوځي سرچينو له قوله راپور وركړى دى، چې د پاكستاني طالبانو دمشر بيت الله مسعود پر ضد د حتمي جګړې لپاره چمتوالى نيسي او د هغه له مخالفينو سره يې خبرې اترې پيل كړي دي.

 

د راپورونو په اساس د پاكستان دولت هڅه كوي چې له بيت الله مسعود څخه نور جنګيالي قومندانان رابيل كړي او د همدې هدف لپاره يې په شمالي وزيرستان كې د جنګياليو له دوو مشهورو قومندانانو مولوي نذير او حافظ ګل بهارد سره خبرې اترې  پيل كړي دي.

په شمالي او جنوبي وزيرستان باندې د پوځي عملياتو راپور په داسې حال كې وركول كيږي چې پاكستاني پوځ د سوات په سيمه  كې د تيرو دوو اونيو راهيسې په عملياتو بوخت دى او پرون يې په دغې سيمه كې د يوه ښار منګورې د نيولو ادعا وكړه.

بلخوا په تيرو څو ورځو كې د پاكستان په لاهور او پيښور ښِارونو كې هم په پرله پسې توګه چاودنې وشوې چې په سلګونو خلكو ته يې مرګ ژوبله واوړوله او د پاكستان دولت بيت الله مسعود په ځينو دغو حملو تورن كړ.

@