خوست ښار:- نن چهارشنبې دسلواغې دمياشتې په ١١نېټه د١١بجو او ٤٠دقيقو پرمهال   دخوست ولايت اړوند يعقوبيو اوصبريو ولسوالۍ په بازارکې هغه مهال  تريوې غرفې لاندې ځاى پرځاى شوى ماين چاودنه وشوه چې ملي پولس دسيمې څخه دتيريدو په حال کې وو ددغه چاودنې  په پايله کې  ٢تنه ماشومان شهيدان  او ٤تنه  بې ګناه  ملکي کسان ټپيان شول ،ددغه چاودنې له امله پوليسوته هيڅ زيان ندى رسيدلى  ،داسلام ،ولس ،سولې اوبشريت ددښمنانودغه ډول ناروا  اود اسلامي اصولو خلاف کړنې په ټينګه دغندنې وړ دي.

داسلام ،ولس ،سولې اوخاورې دښمنان غواړي  چې په دې ډول شيطاني، تروريستي او ناځوان مردانه اعمالو سره عامه نظم زيانمن اوعام ولس وويروي اومظلومې کورنۍ دغم په ټغر کينوي  ،ترڅو له دې لارې  شومو هدفونو ته ځان ورسوي دخوست ولايت مقام ، دخوست ولايت اتل او مسلمان ولس  او امنيتي ارګانونه  دغه ډول  ټولې کړنې داسلام دمقدس دين خلاف ګڼي اوددغه ډول پېښو او تروريستي اعمالو په مخنيوي کې سره همکار اومتحد دي ،هيڅ چاته به ددې اجازه ورنه کړي چې په دې خاوره کې داسې ناوړه وحشيانه کړنې ترسره کړي چې زمونږ بې ګناه وګړو او اتلو سربازانوته په کې زيان ورسيږي.

دخوست دشريفو ولسونو څخه موغوښتنه داده چې په اسلامي اوملي مسووليت سره ددغه وحشيانه اعمالو په مخنيوي اودعاملينوپه نيولوکې دخپلو امنيتي ارګانونو سره بشپړه همکاري وکړي. ترڅوټولې هغه کړۍ چې په ټولنه کې وحشت ،ترور،ظلم او  تروريستي اعمال ترسره کوي ونيول شي اودخپلو اعمالو له مخې سخته سزاء وويني.

زه دخوست ولايتي ادارې ،ولايتي شورا ،سولې ولايتي کمېټې ،علماوو شورا ،امنيتي ارګانونواوټولو ولسونوپه استازيتوب  دسولې اوثبات ددښمنانو دغه عمل په ټينګه اوسختو ټکو سره غندم ،دلوى خداى پاک ج له دربارڅخه ددغه پېښې  عاملينو ته دسختې سزاء غوښتونکى يم اودلوى څښتن تعالى دسپيڅلي دربارڅخه ددغه پېښې  شهيدانو ته دفردوس جنت او ټپي شويو کسانوته دعاجلې روغتيا غوښتنه کوم .

په درناوي

عبدالجبارنعيمي

خوست والي