مشرانو جرګې هم په كندهار كې د يوه خليجي هېواد د الوتكې بې اجازې راښكته كيدو پر پېښه بحث وكړ او د دې پېښې د پلټنې پريكړه يې وكړه، دا واقعاً ډېره مسخره مساله ده چې افغانستان دې خپلواك هېواد وي خو الوتكې دې پكې ټيټې او پورته شي، د بهرنيانو د پوځيانو، استخباراتو او مېله بازانو غومبر دې پكې جوړ وي.

د دې بدمرغيو يو سر كه د بهرنيو له خپلسريو سره نښلي، بل يې په هېواد كې دننه له هغو جنګسالارانو او په خرمستيو كې ښكيل لوريو سره دى چې په بې نظميو كې راپورته شول، د قانون رعايت ورته زولنې ښكاري او په هېڅ ډول اصولو او نورمونو باور نه لري، دوى د نفسي هوسونو له پوره كولو پرته نه كوم ارمان لري نه ايډيال، د دې هوسونو د پوره كولو لپاره له هېڅ ډول تړاوونو ډډه نه كوي، له بده مرغه په تېرو 11 كلونو كې چې پر نظاد بهرنيانو شوم سيورى پروت دى د همدې شوم سيوري يو شوم سوغات ولس ته همدغه دى چې زموږ د هېواد حريم تر پښو لاندې شي، هر ډول خرمستۍ پكې روانې وي، هېواد د ملا نصرالدين د كلا بڼه لري چې هر بهرنى هر وخت دلته سرې سترګې راتلاى شي، همدغسې له پرديو سره تړلي او د وخت په شرايطو كې را لوى شوي او پړسيدلي ياران چې هر كله هر چېرته وغواړي آزادانه تلاى شي.

دا وړوكې ستونزه نه ده، حكومت چې تر اوسه پر داسې ښكرورو نه دى بريالى شوى چې له خپلسريو يې را وګرزوي يو لامل به يې پخپله د حكومت ناتواني وي بل يې د درې ګونو قواؤ نه همغږي او د قانون د پلي كيدا په برخه كې غفلت دى.

اوس چې مشرانو جرګې د مسالې د څېړنې خبره كړې، خداى دې وكړي چې تر پايه يې پسې تعقيب كړي او په نيمه كې يې پرنيږدي.

كه څه هم د «اى بسا آرزو كه خاك شده» په مصداق ډېره تمه نشته چې دغه مساله دې سمه وارزول شي، نه يوازې د بهرنيو الوتكو بې اجازې راتلل او زموږ په هوايي ډګرونو كيناستل، بلكې هغه ټولې پېښې چې هره ورځ زموږ د ځمكې او فضا پر حريم تيرى كېږي او هېڅ لاره او ګودر يې معلوم نه دى ارزول او پلټل غواړي، په ټوله كې د خپل هېواد د حريم پر اړه د افغانانو راويښيدو ته اړتيا ده، دا تور غوبل به تر كومه وي؟

زموږ ولس به د څو بدمستو په خرمستيو كې ډوبو يارانو د نامردانو لوبو له امله تر كومه داسې بې توقيره وي؟