Posted by اسعداباد (پژواک ): د کونړ په وټه پور ولسوالۍ کې د امريکايي ځواکونو يو افسر د اسلام په مبارک دين مشرف شو.
د جيمز ګرانټ په نوم دغه امريکايي افسر د وټه پور ولسوالۍ د ايتلافي ځواکونو په مرکز کې په دنده بوخت دى او د امريکا د متحدو ايالتونو د ټينسي ايالت اوسېدونکى دى.
جميز، چې په امريکايې پوځ کې د ضابط رتبه لري ، وايي، چې له تېرو اوو مياشتو راهيسې يې د اسلام مبارک دين په اړه څېړنې او مطالعه پيل کړې وه .
هغه، چې پرون يې د يو لړ مراسمو په ترڅ کې اسلام ومانه، پژواک خبري اژانس ته وويل: ((اسلام راته ډېر ښه او رښتنى دين ثابت شو، نو ځکه مې اسلام قبول کړ.))
جميز، چې پخوانى دين يې عيسويت و، زياتوي، کله چې يې د اسلام دين د قبلولو پرېکړه وکړه ، نو له خپلې ښځې سره يې چې هغه عيسوى مذهبه ده، مشوره وکړه.
نوموړى وايي: ((هغې هم زما د اسلام په راوړلو کې مخالفت ونه کړ، دوه بچيان لرم او چې کله بېرته خپل کور ته ستون شم، نو لومړى به خپلې ښځې ته د اسلام دعوت ورکړم او بيا نورو ته.))
جيمزګرانټ ته د وټه پور ولسو الۍ په جامع جومات کې د ملي پوځ ملا امام حميدالله کليمه طيبه او امنت بالله ولوستله .
مولانا حميدالله په جيمز ګرانټ اسلامي نوم محمداصف کېښود او هغه ته يې د اسلام مبارک دين په مشرف کېدو مبارکي وويله .
وروسته د ملي پوځ د شپږم کنډک افسرانو او سربازانو د محمد اصف غاړې ته ګلونه ور واچول .
د شپږم کنډک قوماندان محمداصف ناصري پژواک اژانس ته وويل، چې د دوى د کنډک عقيدتي مسوولينو د جيمز ګرانټ په اسلام مشرف کېدو کې ډېرې هلې ځلې کړې دي.
له دې وړاندې هم په پېچ دره او اسمار ولسواليو کې د ايتلافي ځواکونو په مرکزونو کې ځينو امريکايې پوځيانو د اسلام مبارک دين راوړى و.