کابل (پژواک ) : د ولسمشر وياند وايي، چې حامد کرزي د امريکا ولسمشر بارک اوباما ته د بګرام زندان د بشپړ سپارلو په اړه يو ليک استولى دى.

دغه څرګندونې د ولسمشر حامدکرزي وياند ايمل فيضي د ليندۍ په ١٠مه له پژواک خبري اژانس سره په يوې ځانګړې مرکه کې وکړې .

هغه زياته کړه ،چې ددې ليک موخه په بشپړه توګه د افغانستان حکومت ته د بګرام زندان سپارل دي .

د فيضي په وينا، اوس هم د بګرام زندان په بشپړه توګه د افغانستان حکومت ته نه دى سپارل شوى .

د ولسمشر د وياند په خبره ، دا چې افغانستان د امريکا يو دوست هېواد دى ، نو که  امريکا غواړي ، چې افغانستان يې متحد او ستراتيژيک ملګرى  وي ، نو بايد د افغانستان ملي حاکميت ته په تمامه مانا درناوى وشي .

د ولسمشر وياند وويل، چې يو پلاوى په دې کار کوي ، چې د بګرام زندان پروسه د افغانستان د نافذه قوانينو په رڼاکې په بشپړه توګه ترسره شي .

افغان او امريکايي چارواکيو د تېر کال په کب مياشت کې هوکړه وکړه، چې د بګرام زندان ټولې چارې او بنديان افغان دولت ته وسپاري، چې له مخې يې د روان کال د وږي په ٢٠ مه ددغه زندان چارې افغان لوري ته وسپارل شوې، خو چارواکي وايي ،چې لا هم ځينې کسان له امريکايانو سره بنديان دي.

خو د روان کال د لړم په ٢٩ مه افغان حکومت ويلي وو، چې په بګرام زندان کې د امريکايي ځواکونو لخوا د افغان بنديانو ساتل د دې زندان په اړه له شوې هوکړې ښکاره سرغړونه او د افغانستان د ملي حاکميت نقضول دي.

بلخوا د ولسمشر وياند د  انګلستان د دفاع وزير هغه څرګندونې هم په کلکه رد کړې ، چې دوى له ځانه سره ساتلي بنديان افغانستان ته نه سپاري.

د انګلستان د دفاع وزير فېلپ هوماند پرون ويلي و ، چې له دوى سره په هلمند ولايت کې يو شمېرافغان بنديان به د افغانستان حکومت ته ځکه ونه سپاري ، چې هلته بياپه افغاني زندانونو کې ځورول کيږي .

بريتانوي چارواکي وايي، دوی اندېښنه لري ، چې د افغانستان په محبسونو کې به بنديانو ته شکنجه ورکړل شي.

خو د ولسمشرکرزي وياند د انګلستان د دفاع وزير ددغو څرګندونو په غبرګون کې وويل ،چې په دې اړه د افغانستان د حکومت موقف له پخوا څخه ښکاره او واضح ده او هغه دا چې هيڅ بهرنى هېواد په افغانستان کې زندان نشي لرلى او د افغانانو د توقف کولو حق نلري  .

فيضي زياته کړه ، چې په افغانستان کې د بهرنيانو زندان درلودل د افغانستان د ملي حاکميت پر خلاف عمل دى او دغه کار ملي حاکميت ته زيان رسوي .

دده په خبره ، چې هيڅ وخت دا دليل نشي کېداى چې د افغانستان حکومت بنديان نشي ساتلى .

د هغه په وينا،د افغانستان په ادارو کې به ستونزې وي ، خو دا ددې مانا نلري  ، چې بهرني هېوادونه دې دلته زندانونه ولري.