Posted by کابل:- د جمهوری ریاست د خبرپاڼې پر اساس، جمهور رئیس حامد کرزي د افغانستان د دښمنانو لخوا په کندهار ولایت کې د تېرې شپې تروریستي برید په کلکه وغانده.
د ریپوټونو له مخې تروریستانو تېره شپه ناوخته د “اول دو راهي” په سیمه کې تروریستي موټر بم برید تر سره کړ چې له امله یې څلور عام وګړي شهیدان او ۲۰ نور ټپیان شول.
د افغانستان د اسلامي جمهوریت جمهور رئیس حامد کرزي دا تروریستي برید په کلکه وغانده، ویې ویل: د افغانستان د خلکو او آرامۍ دښمنانو تېره شپه په کندهار ولایت کې په داسې حال کې تروریستي برید تر سره کړ چې عام وګړي په خواږه خوب ویده وو.
حامد کرزي څرګنده کړه: د اسلام او د افغانستان د خلکو دښمنان چې غواړي د ملکي وګړیو او بې ګناه د وژنې له لارې ځانونه خپلو شومو موخو ته ورسوي، باید پوه شي چې په دغو ناروا کړنو سره به ددوی په اړه د افغانانو تر منځ کرکه او نفرت لازیات شي.
د افغانستان د اسلامي جمهوریت جمهور رئیس په کندهار ولایت کې د تروریستي برید د قربانیانو کورنیو ته د خپلې ژورې خواخوږۍ او ډاډګیرنې مراتب وړاندې کوي او ټپیانو ته د لوی خدای ج له دربار څخه د سم لاسي روغتیا هیله کوي.