کابل:- جمهور رئیس حامد کرزي د کونړ ولایت له مشرانو، عالمانو او په ملي شورا کې ددغه ولایت له استازو سره په کتنه کې هغوی ته ډاډ ورکړ چې د افغانستان حکومت د پاکستان لخوا پر افغانستان باندې د راکټي بریدونو مسألې ته په ډېر دقت متوجه دی.

په دغې کتنه کې چې نن غرمه په ارګ کې تر سره شوه، د نورو په استازیتوب د کونړ د ولایتي شورا رئیس میاحسن عادل، مولوي سید ولی الله حنیف، سید محبوب پاچا او سناتور رفیع الله حیدری خبرې وکړې او د هېواد له جمهور رئیس څخه یې وغوښتل چې د افغانستان پر خاوره د پاکستاني بریدونو په درولو کې خپلې هڅې تر سره کړي.

د کونړ استازو وویل چې له دوو کلونو راهیسې د کونړ پر ولایت او په ځانګړي ډول د دانګام او ناړۍ پر ولسوالیو د ډیورنډ له کرښې هاخوا بریدونه دوام لري چې د میندو او ماشومانو په ګډون یې زموږ یو شمېر هېوادوال شهیدان کړي دي.

دوی وویل چې د پاکستان پر خلاف د کونړ د خلکو د جهاد فتوا د بل پر حریم د تجاوز په نیت نه، بلکې یوازې او یوازې د خاورې د ساتنې او د ځان ددفاع په خاطر صادره شوې ده.

د کونړ مشرانو د پاکستان لخوا د بریدونو په برخه کې د ناټو او ائتلافي ځواکونو د چوپتیا په اړه اندېښنه وښوده، ویې ویل چې امریکا دې له افغانستان سره د لاسلیک شوي ستراتیژیک تړون له مخې خپلې ژمنې عملي کړي.

د کونړ عالمانو او مشرانو له کرښې هاخوا د راغلو مهاجرینو او په دغه ولایت کې د بې ځایه شویو خلکو په اړه د هېواد له جمهور رئیس څخه وغوښتل تر څو له دوی سره د سرپناه او د ژوند د نورو اړتیاوو په پوره کولو کې لازم اقدامات تر سره کړي.

همدا راز د کونړ مشرانو په دغه ولایت کې د تشکیلاتو د کموالي او ستونزو ته د ښې رسیده ګۍ په خاطر د افغانستان له جمهور رئیس څخه وغوښتل چې دغه ولایت دې له درېیمې درجې څخه دویمې درجې ته پورته کړي.

د هېواد جمهور رئیس د کونړ ولایت د مشرانو او عالمانو د وړاندیزونو او غوښتنو له اورېدو وروسته دوی ته ډاډ ورکړ چې د افغانستان حکومت د پاکستان لخوا د راکټي بریدونو د مسألې په اړه د پاکستان د حکومت له چارواکو او نړیوالې ټولنې سره له نږدې په تماس کې دی.

حامد کرزي څرګنده کړه چې د افغانستان حکومت به هېڅکله هم په داسې اقدام لاس پورې نکړي چې د ډیورنډ له کرښې هاخوا عام ولس ته پکې زیان ورسیږي، ځکه د کرښې ها خوا اوسیدونکي هم زموږ وروڼه او خویندې دي او موږ نه غواړو چې هغوی دې ضرر وویني.

د هېواد جمهور رئیس په کونړ کې ددغه ولایت د خلکو وروستۍ ناستې او خپرې شوې اعلامیې ته د اشارې په ترڅ کې وویل چې ستاسو غونډه او خپره کړې اعلامیه د افغانستان د ټولو خلکو په نوم د وطن دوستۍ، شهامت، غیرت او په دې نامه وه چې دا خاوره خاوند لري.

حامد کرزي د کونړ ولایت چارواکو ته لارښوونه وکړه چې په دغه ولایت کې د ځایه شویو خلکو او له راغلو مهاجرینو سره لازمې او چټکې مرستې تر سره کړي.

د غونډې په پای کې د کونړ یوه اوسیدونکي کاتب شاه د پاکستان لخوا پر دغه ولایت د بریدونو په اړه خپل یو وطني او حماسي شعر د غونډې برخه والو ته واوراوه.