Posted by غزني ښار د رارسیدلو خبرونو پر اساس، په غزني ولایت کې دوه ماشومان د تېزابو د پاشلو له امله وژل شوي او مړي يې د ملي اردو ځواکونو لخوا موندل شوي دي.
د غزني د والي مرستيال محمدعلي احمدي په دی هکله وایی، چې تېره ورځ د غزني ولايت اړوند د اندړو ولسوالۍ د نانې په سيمه کې د دغو ماشومانو مړي موندل شوي دي.
د هغه په وينا، وژل شوي ماشومان يو هلک او يوه نجلۍ دي او ښکاري چې هلک لس کلن او نجلۍ اته کلنه وه، چې پر مخونو يې تېزاب پاشل شوي او دواړه ځاى پر ځاى وژل شوي دي.
نوموړي زياته کړه: ((په سيمه کې د ملي اردو سرتېري پر ګزمه بوخت وو، چې دغه وژل شوي ماشومان يې وموندل او وروسته يې په سيمه کې خلکو ته وسپارل.))
د ده په خبره،تراوسه د وژل شويو ماشومانو هويت نه دى څرګند، خو په اړه يې پلټنې روانې دي، چې د کوم ځاى دي او چا وژلي دي.
د والي مرستيال زياتوي، چې په دې تور تراوسه څوک نه دي نېول شوي، خو پوليسو يې په اړه ډېرې جدي پلټنې پيل کړي دي.
د غزني د عامې روغتيا رياست وياند صفي الله هم د دې پېښې پخلى وکړ او زياته يې کړه، چې دوه ماشومان د غزني روغتون ته راوړل شوي، چې پر مخونو تېزاب پاشل شوي وو او د همدې له امله وژل شوي دي.
د هغه په وينا، روغتون ته ياد ماشومان د اندړو ولسوالۍ د نانې سيمې د اوسيدونکو لخوا ور وړل شوي او پر مخونو يې د تېزابو د پاشلو له امله پېژندګلوي نه کيږي.
د اندړو ولسوالۍ د نانې د سيمې اوسيدونکي عيدمحمد، چي دغه جسدونه يې په خپل موټر کې روغتون ته وړي وو، وایی چې دوى ته وژل شوي ماشومان د ملي اردو ځواکونو لخوا ورسپارل شول، چې روغتون ته يې يوسي.
ده زياته کړه: ((ماپه خپله هغه ځاى وليدلو چې دغه ماشومان په کې وژل شوي وو، د دوى د جسدونو ترڅنګ د تېزابو دوې وړې بوشکې هم پرتې وې، خوا ته يې د انسان د پښو او د موټر د ټايرونو نښې هم ښکاريدې.))
د دې پېښې مسووليت تراوسه چا پر غاړه نه دى اخيستى.
د يادونې وړ ده، چې په ٢٠٠٨ زيږديز کال کې د کندهار د ميرويس مېنې د ليسې د ١٥ نجونو پر مخونو هغه مهال د ناڅرګندو کسانو لخوا تېزاب وپاشل شول، چې د ښوونځي پر لور روانې وې، خو په دې پېښه کې څوک ونه وژل شول.