کابل:- د جمهوری ریاست د خبر پاڼې پر اساس، د جمهوررئیس حامدکرزي په مشرۍ اقتصادي غونډې، د هېواد پر صنعتي پالیسۍ بحث او غور وکړ.

په دغه غونډه کې چې د پخوانیو اقتصادي غونډو په دوام، نن په ارګ کې جوړه شوه، لومړی د هېواد د صنعتي پالیسۍ د جزئیاتو په اړه چې په دې وروستیوکې تدوین شوې ده، خبرې وشوې. په دې اړه هغه اووه مورده چې په هغوکې افغانستان نسبي غوره والی لري او هغه په خپلو صادراتوکې داخلولی شي، لکه  د مرمرو د ډبرو، وړیو، غالیو او د یو شمېر نورو توکو په اړه  بحث او د نظر تبادله وشوه.

د بحث پر دوام د صنعتي پارکونو جوړول، د دایمي برښنا برابرول او د صنعت د ودې او د هېواد د صادراتو د پیاوړتیا لپاره له ګمرکي تعرفو څخه استفاده  وڅیړل شوه.

اقتصادي غونډې د هغو قراردادونو په باب چې د خصوصي سکټور لخوا د هېواد د کانونو په برخه کې شوي دي، هم خبرې اترې وکړې او ټینګار یې وکړ چې د هېواد د کانونو د راسپړلو لپاره دې د قراردادونو بهیر په دقیق ډول ترسره شي او په دې برخه کې د دولت رول، په ځانګړې توګه له خصوصي سکټور سره د مشارکت لرل مهم وبلل شول.

په پای کې پریکړه وشوه چې په راتلونکې اقتصادي غونډه کې دې د وارداتو د ځای نیولو لپاره د صنایعو په اړوند او پر هغو برخوکې دې چې افغانستان د هغو په صادراتوکې نسبي غوره والی لري، خبرې او د نظرونو تبادله وشي.