Posted by کابل:- د جمهوری ریاست د خبر پاڼې پر اساس، جمهور رئيس حامد کرزي، د یو لړ تشریفاتي مراسمو په ترڅ کې د افغا نستان لپاره د نوي زیلاند د نوي سفير “جستین پیتر فیپولي” باورلیک و مانه.
د باور لیک د وړاندې کولو له مراسمو وروسته چې نن په ارګ کې پرځای شول، د هېواد جمهوررئیس د افغانستان لپاره د نوي زیلاند سفیرته په نوې دنده کې د بریالیتوب هیله وکړه، وې ویل: دا چې تاسو له ډېر لیرې ځای څخه د نوي زیلاند د حکومت په استازیتوب د افغانستان د خلکو د مرستې او همکارۍ لپاره راغلي یاست، قدرداني مو کوم.
په مقابل کې د نوي زیلاند سفیر په افغانستان کې د خپل ماموریت له پیل کیدو څخه د خوښۍ د څرګندولو په ترڅ کې د بامیانو په ولایت کې د هغه هېواد د یو شمېر پروژو، په ځانګړې توګه د لمریزې انرژۍ د پروژو د کار د جریان په اړه حامدکرزي ته معلومات ورکړل.
ده، همدا راز ژمنه وکړه هڅه به وکړي چې په افغانستان کې د خپل ماموریت په دوران کې د دواړو هېوادونو ترمنځ د اړیکو د پراختیا لپاره ګټور کارونه ترسره کړي.
د یادولو وړ ده چې د باورليک د وړا ندې کولو په مراسموکې د بهرنيو چارو وزارت سیاسي معین جاوید لودین او د دغه وزارت د تشريفاتو رئيس حميد صديق هم برخه لرله.