کابل:- د جمهوری ریاست د یوې خبر پاڼې پر اساس،  جمهوررئیس حامدکرزي هغه تروریستي برید په کلکه وغانده چې  د کندهار د هوايي ډګر دروازې ته څېرمه د کندهارـ بولدک په سړک کې زموږ د یو شمېر بیګناه خلکو د مرګ ژوبلې سبب شو.

د کندهار د والي د دفتر د معلوماتو له مخې، یو ځان مرګي تروریست چې په یو کرولا موټرکې یې چاودیدونکي توکي ځای پرځای کړي و، نن غرمه د کندهار د هوايي ډګر دروازې ته څېرمه د کندهارـ بولدک په سړک کې وچول چې له امله یې د دوه ماشومانو په شمول زموږ ۷ تنه هېوادوال شهیدان او د یوې ښځې او دوه ماشومانو په شمول اته تنه نور ټپیان شول.

د هېواد جمهوررئیس د ښځو او ماشومانو وژل ستره بې رحمي، د افغاني او اسلامي فرهنګ پرخلاف یو ډارن عمل وباله او یو ځل بیا یې له طالبانو په ټینګار سره وغوښتل چې د ښځو، ماشومانو او نورو بیګناه خلکو له وژلو څخه لاس واخلي.

د هېواد جمهوررئیس د دغه تروریستي برید د شهیدانو کورنیو ته د خپلې ژورې خواخوږۍ او ډاډګیرنې مراتب وړاندې کوي او ټپیانو ته د لوی خدای له درباره د سملاسي روغتیا هیله کوي.