کابل:- د جمهوری ریاست د مطبوعاتی دفتر د رالیړل شوې خبر پاڼې پر اساس، جمهوررئیس حامدکرزي دکنړ ولایت له شمېر مشرانو او په ملي شورا کې د دغه ولایت د خلکو له استازو سره په کتنه کې، هغوی ته په هېوادکې د روانو سیاسي مسلو په اړه معلومات ورکړل او په دې باب یې د هغوی نظرونه وا وریدل.

په دغه کتنه کې چې نن غرمه په ارګ کې ترسره شوه، سلاکار وزیر وحیدالله سباوون،شجاع الملک جلاله، حاجي روح الله او په ولسي جرګه کې د کنړ ولایت د خلکو استازي صلح محمد صالح د نورو په استازیتوب خبرې وکړې، د دغه ولایت د پیچ په دره کې د مناګي د برښنا پر بند باندې چې د سروې کارونه یې پای ته رسیدلي دي،په عملي توګه دکار د پیل کیدو غوښتنه وکړه.

دوی، همدا راز له درییمې درجې څخه دویمې درجې ته دکنړ ولایت د لوړیدو او د دولتي ادارو په مناسبو څوکیو کې د دغه ولایت د یو شمېرکادرونو په ځای پرځای کیدلو باندې ټینګار وکړ.

حامدکرزي کنړ یو علم روزونکی او پرمختګ غوښتونکی ولایت وباله، ژمنه یې وکړه چې د هغوی یو شمېرکادرونه به په مناسبو دولتي څوکیوکې په دنده وګماري او د نورو غوښتنو په باب یې هم لازمې کړنې ترسره شي.