Posted by نن د مرغومي شپږمه ده، پر هيواد د پخواني شوروي اتحاد د سره وحشت د ناتار ۳۲مه كليزه ، زموږ ولس د پخواني شوروي د سره وحشت د بدنام يرغل كليزه داسې مهال غندي چې د تور وحشت شوم سيورى موپر هيواد غوړيدلى دى، زموږ پر كليو او كورونو اوس هم د بهرنيو پوځونو يرغلونه كيږي، زموږ مظلوم ولس اوس هم له بهرنيو پوځونو نه په فرياد دى خو د تهذيب، تمدن، د بشر د حقوقو د پالنې دعوه داره نړۍ يې نه اوري.
زموږ د نن او پرون ترمنځ يوازينۍ توپير دا دى چې د پروني يرغل پر خلاف افغان ولس دريدلى ؤ، نړۍ يې د بر حق پاڅون ملاتړ وكړ، خو نن افغانستان ته د مرستې او ملاتړ په نامه راغلي بهرني پوځونه هم زموږ د ولس پر وژلو او ځپلو بوخت دي.
نن د پخواني شوروي د يرغل ۳۲مه كليزه افغان ولس په داسې مهال غندي چې لا مو پر كلي او ښار د ماتم ټغر غوړيدلى دى، زموږ پر ولس يوه مرموزه جګړه تپل شوې چې يوه لوري مو په شپو چاپو پر ولس عذابونه نازل كړي او بل لوري په ځانمرګيو وحشتونو.
او
نن زموږ ولس د سره وحشت د يرغل كليزه د تور وحشت تر سيوري لاندې غندي، ځكه چې نه موږ دسره وحشت له شرميدلي پاى نه عبرت واخيست او نه د هغوى پر پله روانو نورو اړخونو، رښتيا چې زموږ ولس ډير مظلوم دى، چې نه يې د «اسلام» د سپيڅلي دين تر شعار لاندې څوك پر مرګونو صرفه كوي، او نه د ديموكراسۍ او بشر د حقوقو علمبرداران دوى ته دژوند حق وركوي.
خو پر دې بايد اعتراف وكړو چې د اوسني تور وحشت لامل هم د ۱۳۵۸ كال د مرغومي د شپږمې بدنام يرغل او آن تر دې وړاندې په ۱۳۵۷ لمريز دغويي د اوومې كودتا وه چې زموږ د هيواد «حريم» ته د پرديو لاسونو راوغځيدل او زموږ په ګلالي هيواد كې د پرديو لښكرو او استخباراتي ادارو بدمرغې لوبې پيل شوې.
زموږ ولس له تيرو ۳۴ كلونو راهيسې مظلوم دى، ځكه چې د پرديو غوبل او غومبر پكې روان دى، خو په دې مظلوميت كې پخپله د ولس لاس هم دى، وينې او سرونه وركوي، يرغلګر مات كړي، خو بيا په كوم ذليل او پردي پال پسې اقتدا وكړي. چې دغه د ماتو او برياؤ، مرګونو او برباديو لوبه ورسره تكراريږي.
دريغه افغان ولس دې ټكي ته پام كړى واى، نور يې په داسې ذليلو څيرو پسې زنده باد نارې نه اوچتولاى چې هغوى يې لاس او پښې تړلي د پرديو رحم او كرم ته پريږدي.
دريغه موږ نن د تور وحشت تر سيوري لاندې د سره وحشت د يرغل له كليزې همدغه درس واخلو.
دريغه!
