کابل:- د جمهوری ریاست د مطبوعاتی دفتر د خبر پاڼې پر اساس جمهور رئیس حامد کرزی نن له غرمې مخکې د یوه لوړ پوړي دولتي پلاوي په مشرۍ د استانبول د سیمه ییزو همکاریو په کنفرانس کې د ګډون په موخه ترکیې ته روان شو.
د هېواد جمهور رئیس به د افغانستان په اړه د استانبول په کنفرانس کې چې د سیمه ییزو همکاریو د پیاوړتیا په موخه جوړشوی دی، د سیاسي، امنیتي او اقتصادي همکاریو د پراختیا په اړه وینا وکړي.
همدا راز حامد کرزی به د سې شنبې په ورځ د افغانستان، ترکیې او پاکستان ترمنځ په درې اړخیزه شپږمه غونډه کې چې د سیمه ییزو سیاسي، امنیتي او انکشافي همکاریو د پراختیا په باب به په کې خبرېاترې وشي، ګډون وکړي.
دغه راز حامدکرزی به د استانبول په کنفرانس کې د ګډون ترڅنګ د ترکیې له ولسمشر عبدالله ګل او د امریکا د متحده ایالاتو د بهرنیو چارو له وزیرې هیلري کلنټن سره هم وګوري.
له جمهور رئیس حامدکرزي سره ترکیې ته په دغه سفرکې د بهرنیو چارو وزیر ډاکتر زلمی رسول، دملي امنیت سلاکار ډاکتر رنګین دادفر سپنتا،د ملي دفاع وزیر سترجنرال عبدالرحیم وردګ، دکورنیو چارو وزیر بسم الله محمدي، د کانونو وزیر وحیدالله شهراني، د ملي امنیت لوی رئیس رحمت الله نبیل، د بهرنیو چارو د وزارت سیاسي معین جاوید لودین، لوی درستیز جنرال شیرمحمد کریمي، د جمهوري ریاست د عالي مقام د دفتر رئیس عبدالکریم خُرم او د جمهوري ریاست ویاند ایمل فیضی ملګرتیا کوي.