کندهار ښار : د رارسیدلو خبرونو پر اساس په کندهار ښار کې نن سهار د يوې موسسې پر ودانۍ د شويو ډله ييزو بريدونو له امله د پوليسو د يوې حوزې د امر او د درېيو نيپاليانو په ګډون شپږ تنه وژل شوي دي.
يوه ډله ځانمرګي بريد کوونکي، چې په سپکو او درنو وسلو سمبال وو، نن (د لړم ٩مه) سهار شاوخوا شپږ بجې د کندهار ښار د دويمې ناحيې اړوند، د نوي ښار په سيمه کې د اي ار ډي په نوم د يوې موسسې پر ودانۍ بريد وکړ.
يوه بريدکوونکي لومړۍ له چاودېدونکو توکو ډک خپل موټر ته د يادې موسسې په دروازه کې چاودنه ورکړه او وروسته نور ودانۍ ته دننه شول او وسلواله نښته يې پيل کړه.
د کندهار د ولايت مطبوعاتي دفتر پژواک خبري اژانس ته وويل، چې په دې پېښه کې د کندهار ښار د شپږمې امنيتي حوزې امر، چې لومړى سخت ټپي شوى و، له دوو ملکي وګړو سره وژل شوى دى.
د سرچينې د معلوماتو له مخې، چې په نښته کې يو نيپالى ساتونکى او درې عام وګړي ټپيان او د کندهار ميرويس روغتون ته وړل شوي دي.
خو په دغه ولايت کې يوې لوړ پوړې امنيتي سرچينې، چې د نوم له اخيستو يې ډډه کوی وایی، چې په روانه نښته کې درې نيپالي ساتونکي هم وژل شوي دي..
د ميرويس په نوم يوه عيني شاهد وایی، چې يوه ځانمرګي بريد کوونکي له چاودېدونکو توکو ډک خپل موټر ته د اى ار ډي موسسې په دروازه کې چاودنه ورکړه او نور بريد کوونکي دننه ننوتل او وسلواله نښته يې پيل کړې ده.
دغه جګړه تر اوسه، د سهار نهه بجې او ٤٥ دقيقو پورې ادامه لري او سيمه د افغان او بهرنيو ځواکونو له خوا کلابنده شوې او په هوا کې د بهرنيو ځواکونو چورلکې هم ګرځي.
طالب وياند قاري يوسف احمدي وايي، چې په کندهار ښار کې د اى ار ډي په نوم يوې موسسې ته يې وسلوال دننه شوي او نښته يې پيل کړې ده.
د هغه په وينا، په دې نښته کې يې يو شمېر بهرنيان وژلي دي.
په دې اړه به نور معلومات وروسته خپاره شي.