Posted by کابل:- د جمهوری ریاست د یوې خبرپاڼې پر اساس په دغو ټیلیفوني خبروکې چې پرون مازیګر وشوې، د هېواد جمهوررئیس دسعودي عربستان دولیعهد، دکورنیو چارو دوزیر او ددغه هېواد دوزیرانو شورادمرستیال په توګه دوالا حضرت شهزاده نایف بن عبدالعزیز دټاکل کیدو په مناسبت خپلې ښې هیلې او دمبارکۍ مراتب هغه ته وړاندې او هیله یې وکړه چې د الحرمین الشرفین دخادم اعلیحضرت ملک عبدالله بن عبدالعزیز ترخردمندانه قیادت لاندې چې نه یوازې دسعودي عربستان پادشاه دی، بلکې زموږ او دټولې اسلامي نړۍ مشر دی، خپلې اړوندې چارې په بریالیتوب سره ترسره کړی.
حامدکرزي ددغو ټلیفوني خبرو په پای کې والاحضرت شهزاده نایف بن عبدالعزیز ته دبشپړې روغتیا او بریالیتوب ترڅنګ دسعودي عربستان دورور هېواد خلکو ته دنیکمرغۍ او ترقۍ هیله وکړه.
په مقابل کې دسعودي عربستان نوي ټاکل شوي ولیعهد والاحضرت شهزاده نایف بن عبدالعزیز دافغانستان دجمهوررئیس حامدکرزي دټیلیفوني اړیکې او هغه ته دمبارکۍ دمراتبو دڅرګندولو له امله مننه وکړه، وې ویل: هیله لرم چې دسعودي عربستان خلکو او ټول مسلمه امت ته دخدمت مصدر وګرځم.
والاحضرت شهزاده نایف بن عبدالعزیز هیله وکړه چې په افغانستان کې ډیر ژر تلپاتې سوله ټینګه او ددواړو وروڼو هېوادونو ترمنځ اړیکې لا پراخه شي.
د سعودي عربستان نوي ټاکل شوي ولیعهد د خپلو خبرو په پای کې، وویل: ستاسو لخوا دغه ټیلیفوني اړیکه مې دخوښۍ وړ وګرځیده، هیله لرم چې ډیر په افغانستان کې ستا سو په مشرۍ همیشنۍ سوله او ثبات ټینګ شي.
