کابل:- له نړیوالو ځواکونو څخه افغان ځواکونوته دامنیـت دلـیږد دوهم پړاو دې په جـدي توګه عملي شي.

دغه ټکی د افغانستان د جمهوررئیس حامد کرزي نن غرمه دهېواد له یو شمېر والیانو سره په کتنه کې څرګند کړ.

په دغه کتنه کې چې په ارګ کې ترسره شوه، په داسې حال کې چې دملي دفاع، کورنیو چارو او دمالیېوزیران،دسیمه ایزو ارګانونو دخپلواکې ادارې رئیساو دملي امنیت دلوی ریاست مرستیال هم حاضر و، دلیږدد کمیسیون رئیس ډاکتر اشرف غني احمدزي  دلیږ په دوهم پړاوکې له نړیوالو ځواکونو څخه افغان ځواکونو ته دامنیتي مسوولیتونو دسپارلو لپاره دچمتوالي په اړه خبرې وکړې او وې ویل: له پیل څخه په عمومي کچه دیوه ملي بهیر په توګه له نړیوالو ځواکونو څخه افغان امنیتي ځواکونو ته دمسوولیتونو له سپارلو څخه هرکلی شوی دی او دهېواد دجمهوررئیس داصولي پریکړو لپاره دوګړنیز سراسري بسیج لپاره پوره چمتوالی موجود دی.

ډاکتر اشرف غني احمدزي زیاته کړه: دهېواد دجمهوررئیس لخوا دلیږد دبهیر مسله دهرکلي وړده خو دهېواد والیان دژمنو دپلي کیدو له اړخه  اندیښنه لري او وایي که چیرې دطرحو او عمل ترمنځ واټن رامنځته شي او اړونده ادارې خپل کارونه په سمه توګه ترسره نه کړي، دغه بهیر به له ناباورۍ او خدای مه کړه له ناکامۍ سره مخامخ کړي.

دلیږ دکمیسیون رئیس وویل: ددې لپاره چې دلیږد دوهم پړاو له لومړي پړاو څخه سخت او حساس دی نو لازمه ده چې د ملي اردو د دومداره تمویل او تجهیز لپاره دې جدي کار ترسره، دپولیسو تشکیل دې پراخ، په سرحدي ولایتونوکې دې دسرحدي پولیسو ځواکونو په پرمخ تللو وسلو سمبال او پیاوړي کړای شي.

ډاکتر اشرف غني احمدزي په دې باندې ټینګار وکړ چې په هېوادکې د ډاډمن امنیت دټینګښت لپاره دې له سیاسي او ټولنیزو لارو چارو کار واخیستل شي او پرګنې دې په دې لاره کې همکارۍ ته راوبلل شي.

حامدکرزي د ډاکتر اشرف غني احمدزي دخبرو له آوریدو وروسته، والیانو ته په خطاب کې وویل: له نړیوالو ځواکونو څخه افغان ځواکونوته دامنیت دلیږد دوهم پړاو په جدي توګه عملي کړی، موږ او تاسو دافغانستان دخلکو خدمتګاران یو، زموږ دنده ده چې دهغوی دسر، مال او عزت ساتنه وکړو.

دهېواد جمهوررئیس دښې حکومتوالۍ، ظرفیت جوړونې او دادارې داصلاح په لاره کې د ډاکتر اشرف غنياحمدزي لخوا وړاندې شوی رپوټ ډیر مهم وباله او په هغه کې د یادو شویو موضوع ګانو د عملي کیدو ډاډ یې څرګند کړ.

 د یادونې وړ ده چې دلیږد دوهم پړاو به په نیږدې راتلونکي کې په جوړیدونکې لویه جرګه کې اعلان شي.