کابل  : د ناټو په مشرۍ  ايساف ځواکونه وايي،  چې د کابل ښار په ننني ځانمرګي بريد کې يې ١٣ سرتېري وژل شوي دي.يوه ځانمرګي بريد کوونکي  نن (د لړم په ٧مه) له غرمې مخکې په يوولس نيمو بجو د کابل ښار د شپږمې امنيتي حوزې اړوند د دارالامان پر سړک د ايساف ځواکونو پر کاروان ځانمرګى بريد وکړ.

 د کورنيو چارو وزارت د يوې خبرپاڼې په خپرولو سره ويلي ، چې ياد شوي ځانمرګي بريد کوونکي له چاودېدونکيو توکيو د ډک کرولا موټر په وسيله دغه بريد ترسره کړى ، چې له امله يې څلور تنه وژل شوي دي .

 خو د کورنيو  چارو وزارت په دې پېښه کې  ايساف ځواکونو ته د اوښتې مرګ ژوبلې په اړه معلومات نه دي ورکړي .

 بلخوا په کابل کې دايساف ځواکونو د مطبوعاتي دفتر له خوا نن له ماښام وروسته پژواک اژانس ته په يوه رالېږل شوې خبرپاڼه کې ويل شوي، چې د کابل ښار په ننني ځانمرګي بريد کې يې ١٣ سرتېري وژل شوي دي.

 خو ايساف د وژل شويو سرتېرو هويت نه دى په ډاګه کړى، بلخوا ځينو سرچينو ويلي چې وژل شوي سرتېري امريکايي دي.

 د يادونې ده، چې په روان زېږديز کال کې په يوه پېښه کې د ايساف ځواکونو ته د اوښتي ځاني زيان  دا دويمه لويه پېښه ده.

 څو مياشتې مخکې د ميدان وردګو په سيد اباد ولسوالۍ کې وسلوالو طالبانو د امريکايي ځواکونو يوه چورلکه ويشتلې وه، چې له امله يې ٣١ سرتېري وژل شوي وو.

 بلخوا په کابل کې د استقلال روغتون مشر ډاکټر علي اېشان وايي چې له ياد بريد څخه اته ټپيان او دوه مړي دې روغتون ته وروړل شوي دي .

 دى وايي چې په وژل شويو کسانو کې يو پوليس او يو ملکي وګړى او په ټپيانو کې دوه ماشومانو او شپږ نارينه شامل دي .

 د کابل ښار د ننني ځانمرګي بريد مسووليت طالبانو پرغاړه اخيستى دى .

 طالب وياند ذبيح الله مجاهد پژواک اژانس ته وويل چې دعبدالرحمن هزاربز په نامه د دوى يوه  طالب په کابل ښار کې د بهرنيو ځواکونو يو بس موټر په نښه کړى دى .

 هغه ادعا وکړه، چې په دې بريد کې ٢٥ بهرنيان او يو عام وګړى وژل شوي او درې نور ملکي وګړي ټپيان دي.

د روان زېږديز کال له پيل راهيسې د هېواد په بېلا بېلو سيمو کې د ناټو د وژل شويو سرتېرو شمېره ٥١٥ تنو ته ورسېده.