كابل- د کورنيو چارو وزير محمد حنيف اتمر وايي چې بې قانونه ملېشې بايد له منځه لاړې شي، ځکه ولس نور د ملېشه يي چلند زغم نه لري.

نوموړي دغه څرګندونې پرون كندهار ولايت ته د خپل سفر په ترڅ کې، د وړمې ورځې د خونړۍ پېښې په اړه، يوې خبرې غونډې ته وکړې، چې په پايله کې يې د دغه ولايت د امنيه قوماندان او جنايي مدير په ګډون شپږ  پوليس چارواکي ووژل شول او ٦ نور ټپيان شول .

دکورنيو چارو وزير وويل چې ديادې شوې پېښې په تړاو، د ولسمشر کرزي له حکم سره سم د څو ساعتونو په اوږدو کې ٤١ قانون ماتوونکي ونيول شول او همدا پرون په کابل کې د کورنيو چارو وزارت په نظارت خونه کې بند کړاى شول.هغه زياته کړه،چې د پېښې د پلټنې په موخه يې دکورنيو چارو وزارت، ملي امنيت او څارنوالۍ څخه ګډ پلاوى ټاکلى، چې پايلې به يې په څو اونيو کې نه، بلکې په څو ورځو کې په ډاګه شي.

د اتمر په وينا، دا خبره څرګنده ده، چې څارنوالۍ ته د ٤١ وسله والو کسانو راتګ او بيا پر پوليسو بريد يوه تصادفي پېښه، نه بلکې يو پلان شوى کار دى. دى وايي دا چې دغه پلان چا طرح کړى و او تر شا يې کوم لاسونه کار کوي، د پلټنو تر بشپړېدو وروسته به په ډاګه شي.نوموړي دغه عمل د افغانستان د دولت او قانون په خلاف بغاوت وګاڼه او ويې ويل چې دغو کسانو ته به ډېره سخته سزا ورکړل شي.

اتمر دخپلو خبرو په دوام په ډېرو سختو ټکيو کې وويل، چې بې قانونه ملېشې بايد له منځه يوړل شي، ځکه ملېشه يي چلند نور د زغملو نه دى.د هغه په خبره، په دې اړه پرېکړه شوې، چې په لومړي ګام کې به بې قانونه ملېشې د قانون تابع شي او په دويم ګام کې به ورو ورو له منځه يوړل شي. دى وايي چې دا کار ځکه په دوو پړاوونو کې کوي، چې د همدغو شخصي کمپنيو ملېشې هم د هېواد بچيان دي، د پوليسو په څېر دوى هم د وطن په خاطر وژل کېږي او قرباني ورکوي. نوموړي زياته کړه: (( موږ د هغوى قربانيو ته احترام لرو، ولې ملېشه يي چلند يې په هېڅ توګه نه شي زغملى او بايد له منځه يوړل شي)). حنيف اتمر وويل چې د وړمې ورځې خونړۍ پېښې هېواد او نړۍ ته وښودله، چې که ملېشې تر قانون لاندې نه وي، نو دغه راز بدې پېښې به رامنځته کړي.

نوموړي وويل چې په راتلونکو څلورو اونيو کې به په کندهار ښار او ولسواليو کې ٥٠ سلنه نور پوليس ځاى پر ځاى شي. هغه په دې برخه کې د سوېل لوېديز زون د پوليسو د قوماندانۍ مرستيال جنرال ميرويس نورزى د کندهار ولايت د سرپرست امنيه قوماندان په توګه وټاکه او له هغه يې په امنيت کې د پراخو او پرله پسې هڅو هيله وکړه. اتمر د غونډې په پاى کې د وړمې ورځې د پېښې له قربانيانو سره د مرستې خبره هم وکړه او ويې ويل چې دولت به هېڅکله هم د هغوى کورنۍ بې پاملرنې پرېنږدي.