کابل:- د کورنيو چارو وزارت د نشه يې توکو پر وړاندې د مبارزې مرستيال بازمحمد احمدي نن په يوه خبري ناسته کې وويل، چې دغه توکي او د نشه يي توکو د پروسس لابراتوارونه د تلې د مياشتې په ٤مه، د افغان او ايساف ځواکونو په ګډو عملياتو کې د هلمند د باغران ولسوالۍ د شاتوت په سيمه کې له منځه وړل شوي دي.

باغران د هلمند شمال لوېديځ ته لرې پرته ولسوالۍ ده، چې د اروزګان ولايت له چارچينو او د غور ولايت له پسابند ولسوالۍ سره ګډې پولې لري.

احمدي وايي، چې په دې عملياتو کې ٣٢٤ کيلو هرويين، ١٤٤٠٠ لیټره اوبلن مورفيم او ٤٠ کيلو جامد ترياک له منځه وړل شوي دي.

هغه زياتوي، چې په له منځه وړل شويو توکو کې ٢٨٥٠ کيلو ګرامه امونيم کلورايډ، ١٦٤٠٠ کيلو سوډيم کاربونيټ ، ١٢٥ لېټره استيکن هايريد، د پرس ٥ ماشنيونه، ٣٨٥ بيرلونه او ١٨٣ پلاستيکي بوشکې او يوه مخابره هم شامل دي.

سرچينه زياتوي، چې د دې عملياتو پر مهال يو وسلوال طالب وژل شوى او بل ټپي دى.

ده وويل، چې په عملياتو کې يوه پيکا او يو کلاشنيکوف هم د امنيتي ځواکونو لاسته ورغلي دي.

د ده په وينا، يادو لابراتوارونو په لوړ کيفيت هيرويين توليدول، چې په ډېره کچه به امريکايي او اروپايى هیوادونو ته وړل کیدل.

خو د ايساف ځواکونه وايي، چې په دې عملياتو کې د هيرويينو درې لابراتوارونه، ٦٨٧٠ لېټره اوبلن مورفيم، ١٠٠ کيلو هيرويين ،٨٠ کيلو ترياک او ١٢٠٦٥ کيلو کيمياوي مواد له منځه وړل شوي دي.

دوى د له منځه وړل شويو توکو ارزښت تر ٣٠٠ ميليونه ډالره زيات بللى دى.

په ياده خبرپاڼه کې د ايساف ځواکونو عملياتي مشر تورن جنرال جميز بي (James B) ويلي، چې د دې لابراتوارونو له منځه وړلو سره د دولت د وسلوالو مخالفينو مالي زېرمې له منځه ولاړې.

د روان کال د وږي د مياشتې په ٢٧مه، د ناټو په مشرۍ ايساف ځواکونو ويلي وو، چې په همدې ولسوالۍکې د افغان او ايساف ځانګړو ځواکونو د عملياتو په ترڅ کې د نشه يي توکو په له منځه وړل شوې فابريکه کې د ١٥٠ ميليونه ډالرو په ارزښت نشه يي توکي له منځه وړل شوي دي.

د کورنيو چارو وزارت وياند غلام صديق صديقي هم نن د تلې په ٦مه، په ياده خبري ناسته کې وويل، چې په تېره يوه اونۍ کې د هیواد په بیلابیلو سيمو کې ١٢٢ وسلوال مخالفين وژل شوي او ١٣٨ نور نيول شوي دي.

د ده په وينا، په دې موده کې د سړک غاړې ١١٥ ماينونه له منځه وړل شوي او د وسلوالو مخالفينو ٨٤ بیلابیلې وسلې نيول شوې دي.

صديقي زياتوي، چې له دې وسلوالو مخالفينو سره په جګړه کې ٣٤ پوليس وژل شوي او ٦٦ نور ټپيان دي.

دغه راز ده وويل، چې په دې موده کې د هیواد په بیلابیلو سيمو کې اته ځانمرګي بريدکوونکي هم نيول شوي دي.