کابل:- د جمهوري رياست لومړى مرستيال مارشال محمدقسيم فهيم  د احمد ولی کرزی د شهادت له امله خواشینۍ څرګنده ګړی او په یوه پیغام کې وایی:

په ژورې خواشيني سره مې خبرترلاسه کړ چې دهيواد مجاهد ، مخور او سياسي شخصيت ، دکندهار دولايتي شورا رييس اودافغانستان داسلامي جمهوريت دجمهوررييس حامدکرزي ورور احمدولي کرزي نن له غرمې مخکې دافغانستان دخلکو ددښمنانو له خوا ديو تروريستي بريد له امله په کندهار ښارکې په خپل کورکې شهيد کړي شو .

انالله وانااليه راجعون

له دې امله دخپل ژور خپګان مراتب جمهوررييس ،دشهيد احمدولي کرزي دکورنۍ نورو غړو اودکندهار ټولو خلکو ته څرگندوم اودلوى خداى ج له دربارڅخه ارواښاد ته دمغفرت اوکورنۍ اودوستانو ته يې دجميل صبر اوزيات استقامت هيله کوم. په کندهار ښارکې نننۍ پيښه ښيې چې زموږ دخلکو دسولې او ارامي دښمنان هره ورځ په نويو جنايتونو لاس پوري کوي.

احمدولي کرزي په کندهار ښارکې دمهمو جهادي اومخورو څيرو څخه و چې په دغه ولايت کې دحکومت دستنو دپياوړتيا په لاره کې نه ستړي کېدونکې هڅې کړي دي. زه په داسې حال کې چې دغه ناځوانمردانه عمل په کلکه غندم ډاډلرم چې داحمدولي کرزي شهادت به زموږ په هيواد کې دسولې او ارامي دزميني په برابرولو کې دافغانستان داسلامي جمهوريت دهڅو خنډ نه شي . دافغانستان زړور خلکو په وروستيو ورځو کې دجنرال مولانا سيدخيلي ، شهيدجنرال خان محمد، شهيد جنرال داود داود اوشهيد جنرال شاه جهان نوري په شان خپل صديق بچېان دهيواد ددفاع په لاره کې نذرانه کړل.

دافغانستانه دخلکو دښمنان دې په دې پوه شي ددغه هيواد دهر زړور بچۍ په شهادت سره دهيواد ددفاع اودافغانستان دقسم خوړولو دښمنانو ددسيسو او توطيو په وړاندې په مبارزه کې دافغانستان دخلکو عزم اوټينګه اراده لاپسي پياوړي کېږي. يوځل بيا دمجاهد ورور شهيد احمدولي کرزي کورنۍ ته دډاډګيرنې او خواخوږي مراتب څرګندوم.