بروکسل : د روسیې د مخدره موادو سره د مبارزې د ادارې مشر ویکتور ایوانوف اروپايي ټولنې ته  وړاندیز وکړ، چې د افغاني مخدره موادو سره د مبارزې لپاره  باید ګډه اداره جوړه شي. ویکتور ایوانوف څرګنده کړه، چې د افغاني مخدره موادو سره اوسنۍ تګلاره د دې شر مخنیوی نه شي کولای. خو شنونکي په یوه خوله وایي، چې د نوې تګلارې د پلې کولو لپاره باید په قوانینو کې ستر بدلون او سمون راوستل شي.

نړیواله ټولنه اوس هڅه کوي، چې له افغاني مخدره موادو سره د مبارزې لپاره نوې لارې  پیدا کړي. اوس دا ستونزه لا مطرح شوې ده، ځکه چې امریکا د دې هوډ کړی دی، چې له افغانستان څخه خپل سرتیري وباسي. شنونکي وایي د باندي څارنې څخه پرته به په افغانستان کې ګډوډي لا ډېره شي او په نتیجه کې به په هیواد کې د مخدره موادو تولیدات ډېر شي.

د ویلو وړ ده، چې په نړۍ کې د افغاني مخدره موادو تر ټولو ډېر استعمال کونکي روسیه او د اروپایي هیوادونو غړي هیوادونه دي.

د  روسیې  د مخدره موادو سره د مبارزې د ادارې استازي نیکولای کارتوشوف  وایی، چې له افغاني مخدره موادو سره د مبارزې لپاره باید هرو مرو ځانکړې ګډه اداره جوړه شي. د ده په اند د دې ادارې په کار کې نورې سیمه ییزې او نړیوالې ټولنې برخه اخیستلی شي. ښکاره خبره ده، چې د نوې ادارې په کار کې باید ځانګړی رول د ملګرو ملتونو ټولنه ولوبوي.

په بروکسل کې د وینا کولو په ترڅ کې له مخدره موادو سره د روسیې د مبارزې د ادارې مشر ویکتور ایوانوف همدار راز وویل، چې د نړیوالې ټولنې له هلو ځلو سره سره تر اوسه لا د افغاني مخدره موادو ستونزه نه ده لیرې شوې او ورځ په ورځ ډېرېږي.

ویکتور ایوانوف ډاډمن دی، چې له افغاني مخدره موادو سره د مبارزې لپاره پینځه کلن پلان د دې شر په له منځه وړولو کې ډېره مرسته کولای شي.