Posted by محمودراقي (پژواک): دوه فرانسوي خبريالان او د هغوى افغان ژباړن له يو نيم کاله وروسته د وسلوالو طالبانو له منګولو څخه خلاص شول.
دغه دوه فرانسوي خبريالان هر يو سټيفن تاپونه او هروه ګي او د هغوى افغان ژباړونکى دين محمد نږدې يو نيم کال وړاندې، د کاپيسا ولايت له اله ساى ولسوالۍ څخه د وسلوالو طالبانو له لوري تښتول شوي وو.
د تګاب ولسوال عبدالحکيم اخوندزاده پژواک خبري اژانس ته وويل، چې ياد دوه خبريالان او ژباړن يې نن (د چنګاښ 8مه) مازيګر کابو پنځه بجې په دې ولسوالۍ کې د فرانسويانو کمپ ته څیرمه خوشې شول.
د هغه په وينا، د يادو ژورناليستانو او ورسره د افغان ژباړونکي روغتيايي حالت يیښه وو.
اخوندزاده زياته کړه، چې ياد کسان د سيمې د خلکو په همکارۍ د وسلوالو طالبانو له قيد څخه خوشېشول.
هغه د دې خبريالانو د راخوشې کېدو په بدل کې د امتيازاتو ورکولو په اړه بې خبري وښوده.
خو د سيمه ييزو طالبانو د يوه قوماندان غازينورالله يوه خپلوان،چې د نوم له اخيستو يې ډډه کوله،پژواک ته وويل، چې د فرانسويژورناليستانو د خوشې کېدو په بدل کې غازينورالله د ايساف ځواکونو له منګولو خوشی شوى دى.
ايساف او وسلوالو طالبانو دواړو تر اوسه په دې اړه څه نه دي ويلي.
د يادونې وړ ده، چې د يادو ژورناليستانو او د هغوى افغان همکار خوشې کېدل، په کابل کې د فرانسې سفارت هم تاييد کړي دي.