Posted by اورګون:- د رار سیدلو خبرونو پر اساس، اورپکو جنګياليو د پکتیکا ولایت د اورګون ولسوالۍ یو تن قومي مشر او د یادې ولسوالۍ د شورا رئيس عالم خان ځدراڼ وواژه .
عالم خان ځدراڼ د پکتيکا ولایت د اورګون ولسوالۍ د درې ځدراڼو د سيمې اوسيدونکی و. هغه د سيمې قومي مشر او د اورګون ولسوالۍ د شورا رئيس و.
د پکتيکا د والي وياند د حکومت د اطلاعاتو او رسنيو مرکز ته وويل، چې وسله والو مخالفانو عالم خان ځدراڼ تیره چارشنبه د اورګون ولسوالۍ بازار ته د تګ پر مهال د ژندرۍ له سيمې وتښتاوه، چې مړى يې پرون د سروبي ولسوالۍ په مستو سيمې ترلاسه شو.
د پکتیکا والي محب الله صمیم د عالم خان ځدراڼ وژنه په سختو ټکو غندلې او دا کار یې د هيواد او سولې د دښمنانو کار بللى دى. ځدراڼ له شپږو مياشتو راهيسې د پکتیکا ولایت د اورګون ولسوالۍ د شورا د رئيس په توګه کار کاوه.
بل خوا د پکتيکا ولایت د سروبي ولسوالۍ د عباس خيلو په کلي کې د وسله والو مخالفينو او سيمه ييزو پولیسو ترمنځ نښته شوې، چې په پايله کې یې دوه وسله وال مخالفين وژل شوي، یو پیکپ موټر، دوه موټرسایکلونه، يوه پیکا، یوه اندازه چاوديدونکي توکي ترې په سيمه کې پاتې شوي دي.