کابل:- د ملي اردو ځواکونه تر دې وروسته کولاى شي د زابل ولايت په دريو ولسواليو او جنوبي سيمو کې پوځي عمليات ترسره کړي.

په دې اړه په جوړو شويو ځانګړو مراسمو کې د اتل ٢٠٥ نمبر قول اردو قوماندان تورن جنرال عبدالحميد او په افغانستان کې د سوله ساتو ځواکونو مرستيال ډګر جنرال رود ريګوز ګډون کړى و. د اتل ٢٠٥ نمبر قول اردو قوماندان وايي، د افغانستان ملي اردو اوس دا توان ترلاسه کړى، چې په يو شمېر سيمو کې په يوازې ځان عمليات وکړي.
دغه پوځي عمليات به د ٢٠٥ اتل قول اردو د دويمې لوا کنډکونه ترسره کوي.

د زابل والي محمد اشرف ناصري  وایی، چې د ملي اردو سرتېري اوس کولاى شي په خپلواک ډول پوځي عمليات ترسره کړي. دده په وينا، شپږ کنډونه په پام کې دي، چې پنځه يې جوړ شوي او يو د جوړېدو په حال کې دى.

دغه عمليات به د زابل په  میزان، ارغنداب او ده چوپان ولسواليو او د ولايت په جنوبي برخو کې ترسره کيږي.
چارواکي وايي، په دغو ولسواليو کې به افغان ملي اردو له سوله ساتو ځواکونو پرته پخپله امنيتي چارې پرمخ وړي، خو د اړتيا پرمهال به ترې مرسته او همکاري اخلي.

د ولسمشر حامد کرزي د وړانديز او د ليزبون غونډې د پرېکړې پر بنسټ، نړيوال ځواکونه تر ٢٠١٤ ميلادي کال پورې د افغانستان امنيتي چارې افغان امنيتي ځواکونو ته سپاري او دوى به يوازې ملاتړى رول لوبوي. دغه لړۍ به د نوي لمريز کال په پيل کې ولسمشر حامد کرزى په رسمي توګه پرانيزي.