له اوږده انتظار وروسته د سولې عالي شورا اعلان شوه، په دې شورا كې واقعاً داسې كسان هم شته چې په ولس كې وزن لري او په سوله او جوړجاړي كې رول درلوداى شي او داسې كسان هم چې د بن د پريكړو مجبوريت دى چې زموږ نظام به يې خداى خبر دى تر كومه زغمي.

په دې شورا كې د خبرې او استدلال ميړونه هم شته، داسې څوك چې  د ولس سترګې ور اوښتلاى شي او داسې څوك هم چې ښايي د سولې د سبوتاژ له ويرې په شورا كې نيول شوي وي.

خير اوس پر دې څه نه وايو، دغه شورا هسې تشريفاتي يو دمځاى هم كيداى شي چې سياست ځپلي ياران د خپلو تيرو ترخو خاطرو داستانونه پكې تكرار كړي او د هېواد د ملي يووالي او ملي همغږۍ يو تالار هم كيداى شي چې غږ يې د سولې په رسا غږ او ګام يې د هېواد د جګړې ځپلي ولس د ارمانونو د رژيدو او ژغورنې د مز له پيلامه شي.

ولسمشر خپل فرض تر سره كړ، د سولې او تفاهم دروند مسووليت يې د دې 68 تنو پر اوږو ور واچاوه چې هر يو يې نام خدا د ټول هېواد د زعامت او رهبرۍ دعوه دار دى.

دا يو ديني او ملي مسووليت هم كيداى شي چې زمږ سپين روبي مشران د خپلو سياسي تيروتنو كفاره پكې ادا كړي او د مظلوم اوغيرتي افغان د بدې ورځې د ختمولو لپاره په يوه غږ را پورته شي، هم خپله غاړه خلاصه كړي. هم ولس له يوه لوى ناورين نه را و باسي.

او خداى مه كړه دا د ياغي هوسونو او بې قابو شويو نفسونو، او د دنيا د جيفې د ټولولو او قاروني خزانو تر لاسه كولو يوه پلمه هم كيداى شي. خو زموږ هيله دا ده چې خداى د سولې عالي شورا د دغو اعلان شويو غړيو مخه پر خير كړي، زموږ دعا ده چې همدغه شورا زموږ د دغو مشرانو د نفسونو د تزكيې يو وياړلى منځى شي، چې دوى په ګډه سره كيني د خپلو ډلو، خپلې كورنۍ او زامنو د امتياز پر ځاى پكې د خپل آخرت او د خپل ولس د راتلونكې غم و خوري.

خداى دې دغه شورا همدغسې كړي، تير په هير خداى دې د دې شورا غړيو ته دا توفيق وركړي چې د خپل ستر او مظلوم ولس د روانو بدمرغيو د لرې كولو په لار كې مخلصانه ګامونه اوچت كړي او له دې شورا نه بالاخره د ولس د ارمانونو د تر سره كيدو داسې زيرى واورو چې اوس يې ډير لږ افغانان د اوريدو تمه ترې كوي.

(آمين)