(كابل ويسا خبر) د پنجشنبې په ورځ د سيمه ايزو مطالعاتو مركز په هند كې د امريكا د يوه پخواني دپلومات رابرت بلك ويل د څرګندونو په اړه په كابل انتركانتيننتال هوټل كې يو كنفرانس وركړ، دې كنفرانس ته د دپلوماسۍ د انستيتيوت رئيس ډاكتر سخي غيرت، جعفر مهدوي، دادنوراني او استاد رسول باوري خبرې وكړې.

د كنفرانس ويناوالو وويل چې سره له دې چې په افغانستان كې اوږده موده بحران او جګړې وې خو بيا هم زموږ ولس يو موټى او د هر ډول ويش او تجزيې خلاف دى، وينا والو وويل چې كه په افغانستان كې په دې اړه ټولپوښتنه وشي نو تر ۹۹ سلنې زيات هيوادوال به د تجزيې پر خلاف رايه وركړي.

په دې كنفرانس كې استاد رسول باروي وويل چې له نيكه مرغه زموږ په ولس كې د تجزيې پر ځاى د هيواد د بشپړتيا احساس او غوښتنه زوروره ده، زموږ اكثريت ولس د تحميل شويو كرښو د ماتيدو په هيله دي نه د بيليدو او تجزيې.

باوري په تيرو پنځو كلونو كې څو ځلې د هيواد د تجزيه كيدو د ډنډورو راپورته كيدو بهير ته اشاره وكړه، وې ويل چې هر وخت د افغانستان مركزي حكومت كمزورى شوى دى ځينو كړيو د تجزيې خبرې راپورته كړې، ځينو سياسي څېرو هم داسې هيلې ښودلې خو افغان ولس بيا دا هيلې ناكامې كړې دي.

سخي غيرت او جعفر مهدوي هم پردې ټينګار وكړ چې د افغان ولس سره اوبدلې او د تجزيې امكان يې نشته، كه بهرنيان هر څو وغواړي دا هيله يې نشي پوره كيداى.

داد نوراني وويل چې زموږ ولس خپل ملي وحدت ساتي خو سياسي ډلې ټپلې شته چې اختلافونو ته لمن وهي، نوموړي دا هم وويل چې د رابرت بلك ويل خبرې هسې تشې خبرې نه دي، د ښكيلاكي لوريو او لويو هيوادونو دغه نقشې لومړى د يوه نظر په توګه مطرح شي تر څو د ولس غبرګون وګوري او بيا خپل پلان جوړوي، نوموړي وويل چې د سمدستي لپاره د افغانستان د تجزيې خبره مطرح نه ده، خو د امريكا په راتلونكيو پلونونو كې به خامخا وي.

د سيمه ايزو مطالعاتو مركز مشر غفور ليوال ويسا ته وويل چې اصلاً د رابرت بلك ويل د خبرو زيان پخپله امريكا ته واوښت چې په يوه حساسه مساله كې يې زموږ د ولس حساسيت راوپاراوه، او د افغان ولس ذهنيت يې تر ډيره حده په همدې خبره پر خلاف واوښت.

د كنفرانس ګډونوالو دې ته هم اشاره وكړه چې سره له دې جې په كابل كې د امريكا سفير له ويسا ورځپاڼې سره په مركه كې په هند كې د امريكا د پخواني سفير خبرې چټيات وبلل خو دې مسالې ته بايد بې توپيره پاتې نشو.