د پاكستان پوځ ته به له دغه هيواد نه بهر د امريكايي ماهرانو له خوا روزنه وركول كيږي

د پاكستان پوځ له جګړې ستومانه شوى، وسلې يې زړې دي او له جنګياليو سره د جګړې توان نه لري

 

رسنۍٰ+ويسا: د پاكستان دولت موافقه وكړه چې امريكا دې د پوځ په روزنه كې پراخ رو ولوبوي. ددغې موافقې له مخې به امريكا همداراز له وسلوالو مخالفينو سره د جګړې لپاره پاكستان پوځ ته تجهيزات هم وركوي.

د يادې شوې موافقې له مخې تراوسه پورې پاكستان د خپل پوځ د روزنې لپاره يوازې اويا امريكايي ماهرانو ته د داخليدو اجازه وركړې ده. ددغې موافقې پر اساس د امريكا د پوځ روزونكي به د پاكستان پوځ ته له دغه هيواد نه بهر روزنه وركوي. پنتاګون ان په خپله امريكا كې د پاكستان د پوځ د روزنه مطرح كړې ده خو تر اوسه پورې يې د غه ځاى نه دى ورته ټاكلى.

لاس انجلس ټايمز راپور وكړى دى، چې د پاكستان پوځ چې له هند سره د جګړې د خطر په اساس رامنځ ته شوى دى، په درنو وسلو سنبال دى خو له جنګياليو سره د مبارزې لپاره بيا هم ګټورې وسلې نه لري.

د امريكا د دفاع وزارت يو رسمي چارواكى وايي: د پاكستان پوځ له جګړې خسته شوى دى، وسلې يې زړې شوي دي او له جنګياليو سره د مبارزې توان نه لري.

امريكايي چارواكو وروسته له هغې د پاكستاني پوځ د روزنې خبره كوي، چې دغه هيواد په دې وروستيو كې د افغانستان او پاكستان لپاره نوې ستراتيژي اعلان كړه.

اوسمهال په پاكستان كې وسلوال طالبان  ورځ تر بلې په پياوړي كيدو دي او په دغه هيواد كې د خپل نفوذ او فعاليت لمن پراخوي، چې دې حالت د امريكا او ځينو نورو لويديزو هيوادونو شديدې انديښنې راپارولي دي.

د امريكا پوځ په دې باور دى، چې د پاكستان د پوځ روزنه به اوږده مهال كې له جنګياليو سره د مبارزې لپاره برخليك ټاكوونكى وي.