وړمه ورځ په ولسي جرګه كې د خصوصي امنيتي شركتونو د قانون په اړه د وكيلانو پر دې تاوده بحثونه چې د امريكا سفارت ورته ويلي چې بايد دغه قانون پاس كړي كه نه مرستې به ورباندې بندې شي اصلا پر دې اعتراف دى چې په ريښتيا ځينې سفارتونه او نړيواله ټولنه له قانون جوړونې نيولې تر ځينو نورو حساسو مسايلو پورې زموږ په چارو كې لاس وهى او هر ډول فشارونه راوړي.

واقعيت دا دى چې د رسنيو د معلق او بې دركه! قانون نه نيولې د اهل تشيع شخصيه احوال او آن د خصوصي امنيتي كمپنيو تر قانون پورې بهرني لوري ځينې ځانګړي حدود غواړي، چې د ځانګړيو شعارونو په بدرګه يې زموږ پر ولس او چارواكيو غواړي وتپي.

بهرنيان چې په هر نيت او موخه داسې غواړي دلته پرې څه نه وايو خو واقعيت دا دى چې زموږ ټولنه د اروپا او امريكا له هېوادونو څخه ډېر توپير لري، سپين به يې وايو چې يوازې د ژوند د كچې توپيرونه هم نه دي، د ارزښتونو او نورمونو توپيرونه دي. د لويديزو ټولنو د ارزښتونو پر بنسټ موږ ته قوانين جوړول په دې معنا دي چې موږ په لوى لاس خپل هېواد او ولس يوه بل لوى ناورين او يوې سترې بدمرغۍ ته ورټېل وهو.

د ولسي جرګې درانه وكيلان بايد پر دې وپوهېږي چې كه دوى نن د كوم بهرني سفارت فشار او غوښتنې ته سرټيټ كړ او د قوانينو په جوړولو كې يې د خپلې ټولنې غوښتنې او ارزښتونه له پامه وغورځول سبا ته به زموږ ولس او هېواد يو ځل بيا د خپل هويت او وقار لپاره د وينو بيه ادا كوي.

نن كېداى شي په يوه ايماني هوډ او ملي غرور ستونزو ته ځواب وركړاى شي. خو كه يې د كوم امتياز او يا بېځايه تمې له مخې پښې وښوئيدې سبا ته به ولس د دې غلطيو په بدل كې بيا وينې وركوي.

زموږ له ولس او هېواد سره د نړيوالې ټولنې د مرستې او ملاتړ احسان پر سر سترګو، خو خپل ملي هويت، ملي غوښتنې، ديني او ملي ارزښتونه هېڅكله هم له دې احسان څخه قربانولاى نه شو، كه خداى مه كړه داسې كوو دا به ډېر بد قمار وي چې بايلونكي به يې په هر صورت موږ وو.

د ولسي جرګې وكيلان بايد پر دې وپوهېږي چې اوس د لاسوهنو او فشارونو خبره له دې وتلې چې پرده پرې واچولاى شي، ځكه پخپله په ولسي جرګه كې همدغسې باشهامته د ولس استازي شته چې په رسا غږ پر دې مساله اعتراض كوي، دوى ته په كار دي چې په هر څه كې خپلې ملي ګټې او د خپل ولس ديني ارزښتونه د لويديز د خيالي شعارونو نه ورته غوره او محترم وي.