.

جرمني به د افغانستان د ولسمشرۍ له راتلونكو ټاكنو سره لوژيستيكي مرستې وكړي

 

كابل: د جرمني د بهرنيو چارو وزير فرانك والتر شتاين ماير پرون په كابل كې وويل، چې په افغانستان كې د نړيوالې ټولنې برياليتوب په پاكستان پورې تړلى دى. د جرمني خبري اژانس راپور وكړۍ چې نوموړي له ولسمشر حامد كرزي سره له ليدلو وروسته خبريالانو ته وويل: جرمني په افغانستان كې د ترهګرۍ پر ضد د مبارزې له هغې سيمه يېزې حل لارې څخه ملاتړ كوي چې پاكستان هم پكې ګډون ولري.

شتاين مايروويل: تر څو پورې چې دارنګه وضع رامنځ ته نشي، موږ به په افغانستان كې يوازې محدود برياليتوبونه لرو.

د جرمني د بهرنيو چارو وزير پرون په ناڅاپي توګه افغانستان ته سفر وكړ او له ولسمشر حامد كرزي او دبهرنيو او كورنيو چارو له وزيرانو سره يې وكتل.

د هغې خبرپاڼې له مخې، چې د کرزي د وياند له دفتره پژواک خبري اژانس ته رالېږل شوې، شټاين ماير له ولسمشر سره په كتنه كې د افغانستان د بيارغونې او امنيت په موخه، د اوږدمهالو مرستو ډاډ ورکړى دى .

د سرچينې په حواله، د جرمني د بهرنيو چارو وزير په ياده شوې کتنه کې وويل چې هېواد به يې په افغانستان کې د ولسمشرۍ ټاکنو پرمهال، لوژستيکي مرستې وکړي .

ماير دغه راز ژمنه کړې چې هېواد به يې د ټاکنو د امنيت په موخه، شاوخوا ٦٠٠ تنه  نور تازه دمه سرتېري افغانستان ته را ولېږي .

د دولت د رياست په خبرپاڼه کې راغلي دي، چې ولسمشر د جرمني د بهرنيو چارو له وزير سره همداراز د تروريزم او نشه يي توکيو پرضد د مبارزې په اړه، هم خبرې وکړې .

د ولسمشرۍ ټاکنو د امنيت د خونديتوب په موخه د شاوخوا ٨٠٠٠   بهرنيو سترتېرو د اړتيا اټکل شوى او تراوسه د ناټو او ايتلافي ځواکونو په چوکاټ کې ګڼ شمېر هېوادونو، دغې غوښتنې ته مثبت ځواب ويلى دى .

دا مهال د المان شاوخوا ٣٨٠٠  سرتېري د ناټو د ايساف ځواکونو په چوکاټ کې، په هېواد کې د امنيت په ټينګښت بوخت دي