کابل:-دسولې دملي مشورتي جرګې دبهیر او دغې جرګې ته دلازم چمتوالي دنیولو په اړه دافغانستاندجمهورریس حامد کرزي په مشرۍ  دشنبې په ورځ دجمهوري ریاست په ماڼۍ کې  یوه غونډه جوړه شوه.
په دغه غونډه کې چې حضرت صبغت الله مجددي، استاد برهان الدین رباني، حاجي محمد محقق، عبدالهادي ارغندیوال، موسی خان هوتک، استاد اکبري، انوارالحق احدي، سیدحامد ګیلاني،  هدایت امین ارسلا، ډاکتر رنګین دادفر سپنتا، پوهاند نعمت الله شهراني، فاروق وردګ، حبیب الله غالب ، محمد اسماعیل،  حاجي دین محمد، عزیز الله لودین، صادق مدبر او څوتنو نوروګډون کړی و، دسولې دملي مشورتي جرګې دجوړیدو لپاره دلازم چمتوالي دنیولو او داساسي قانون پر تطبیق باندې دڅارنې دکمیسیون دغړو دمعرفي کیدو په باب په هر اړخیز ډول بحث او خبرې اترې وشوې.
ددغې غونډې په بهیرکې دسولې دملي مشورتي جرګې دجوړیدو چارواکو فاروق وردګ او صادق مدبر ددغې جرګې دجوړیدو لپاره دلازم چمتوالي او دهغې دکاري اجندا په اړه غونډې ته رپوټ ورکړ.
دغونډې برخه والو درپوټ له آوریدو وروسته جرګې ته دچمتوالي او دهغې دکاري اجندا په هکله په هر اړخیزه توګه خبرې وکړې.
دغونډې په بله برخه کې داساسي قانون پر تطبیق باندې دڅارنې دکمیسیون دغړو دمعرفي کیدو په باب خبرې وشوې او دغونډې برخه والو په دې اړه خپل نظرونه دافغانستان داسلامي جمهوریت له جمهورریس حامد کرزي شره شریک کړ