Posted by !
د امريكا د پوځ لوى درستيز مايك مولن مارجې ته د سفر پر مهال د هغه ځاى قومي مشرانو ته وويل چې كه امنيت ښه وي نو د بيارغاونې پروژې به پيل شي!
اوس پوښتنه داده چې د بيارغاونې د هغو تودو ژمنو او لاپو شاپو انګازې لا په فضا كې كړنګيږي چې د هلمند او مارجې له ولس سره د جګړې او پوځي عملياتو له پيليدو مخكې تكراريدلې، چې عمليات تر سره شول، د نړيوالو تبليغاتي كمپاين بشپړ شو، هلمند ته د نورو امريكايي ځواكونو د راوستلو لپاره پلمې پوره شوې.د امنيت د ټينګولو خبره بېرته مجهوله پاتې شوه، له يوې مياشتې تبليغاتي لاپو او دريو اونيو بمباريو، او پوځي عملياتو وروسته، د مارجې د زرګونو كورنيو له بيځايه كيدو او د هغوى د ژوند له سختو سرګردانيو وروسته كه بيا هم په مارجه كې نه امنيت وي، نه ښوونځي پرانيستل شوي وي، نه د ماينونو خطر لرې شوى او نه د طالبانو ګواښ د خلكو له سره لرې شوى وي نو ددې پوځي عملياتو ګټه څه وه؟
آيا د لسګونو بې ګناه ښځو او نارينه و وژل او د زرګونو خلكو بې كوره كول يوازې پردې ارزي چې د ويرې او اندېښنې په چاپيريال كې د ولسوالۍ د فعاليدو خبر خپور شي نور د خلكو په ژوند كې له وېرې او مايوسۍ پرته هيڅ نه وي؟
آيا د پوځي عملياتو معنا همدا ده او هغه لاپې چې د مارجې ولسوالۍ او د هملند ولس ته تكراريدلې پايله يې همدغه ده؟
نړيوال ځواكونه او افغان چارواكي بايد دا په ياد ولري چې ولس نور ژمنې له ياده نه باسي، چې كومې ژمنې ورسره كيږي بايد تر سره شي.
وړمه ورځ د امريكا د ولسمشر اوباما په راتلو يو شمير كورنيو او بهرنيو رسنيو دا توپان راپورته كړ چې ښاغلى اوباما د اداري فساد د له منځه وړو په اړه له ولسمشر كرزي نه جدي اقدامات غواړي، دغه مزدورې كورنۍ او د ښكيلاكي كړيو تبليغاتي وسيلې ولې پردې چوپې دي چې نړيوال زموږ له ولس سره ولې داسې نارواوې كوي، ولې ګام پر ګام ژمنې كوي او بيا يې هېروې، ولې د خپلو ژمنو او نارواو حساب كتاب نشي كولاى؟
زموږ له ولس سره تر ټولو لويه دوكه، لوى فريب او لويه درغلي داده چې د بيارغاونې په ژمنو ئې كورونه او كلي ويجاړ شي او پردوى د امن او سولې راوستلو په نامه ويرونه، بدمرغۍ او مرګونه مسلط كړاى شي.