لندن- افغان ولسمشر حامد کرزي د لندن په کنفرانس کې وویل، چې افغان امنیتي ځواکونه دې ته چمتو دي چې د هېواد امنیتي مسوولیت په خپله غاړه واخلي او په راتلونکو دوو دریو کلونو کې به د هېواد د ډېرو ولایتونو کنټرول په خپل لاس کې واخلې.
ولسمشر حامد کرزی وایي، حکومت یې چمتو دی چې د هېواد د امنیتي چارو مسولیت په خپله غاړه واخلي خو په دې کار کې د نړیوالو ملاتړ ته اړتیا لري.کرزي دا خبره په لندن کې د افغانستان په اړه د نړیوال کنفرانس ګډون کونکو ته وکړه. ده وويل: “زما په عقیده زموږ د خلکو هیلې او غوښتنې نن ورځ په څلورو کليمو کې خلاصه کیدای شی، د افغانستان مشري، د افغانستان مالکیت.” خو كرزي له افغانستان څخه په بیړه د نړیوالو ځواکونو د وتلو په وړاندې هم خبرداری ورکړ. کرزی وویل، هېواد یې حد اقل یوه لسیزه بهرنیو ځواکونو ته اړتیا لري. ده زیاته کړه په لسو کالو کې به د افغانستان امنیتي ځواکونه په خپلو پښو ودریږي.
کرزي د لندن په کنفرانس له مرستندویه هېوادونو څخه غوښتنه وکړه، چې له جګړې څخه د جنګېدونکو عناصرو د راګرځولو لپاره دې هغوی ته د کار د شرایطو د برابرولو او په ټولنه کې د بېرته جذبولو لپاره مالي مرستې ورکړي. ولسمشر کرزي وويل چې په راتلونکي پسرلي کې به په کابل کې لويه جرګه وربولي چې له وسله والو مخالفانو سره پر روغې جوړې وغږيږي . هغه وویل، هغه وسله وال به بېرته په ټولنه کې جذب کړي، چې له تروریستي شبکو سره اړیکه نه لري او د افغانستان اساسي قانون ومني.