کابل:- د کابل څخه تازه خبرونه وایی،چی افغان ځواکونه به په سټانډرډ وسلو سنبال شي. ددفاع وزارت داسي مهال د ناټو په ستاندارد وسلو د سمبالولو خبره کوي چې په راتلونکو پنځو کلونو کې يې د اردو د شمېر پر ډېرېدو او پياوړتيا په وار وار ټينګار کړی دی .د افغانستان د دفاع وزارت وايي په پام کې لري د ملي اردو د سرتېرو له ډېرېدو سره پر يوه وخت په نويو وسلو د بدلون لړۍ هم پر مخ بوځي .د دغه وزارت چارواکي وايي تر اوسه څه د پاسه 48000 ميله سپکه وسله او 1145 ميله درنده وسله پوځ ته وېشل شوي . دوی هيله وښوده چې د روان لمريز کال تر پايه به ډېری افغان قطعات د ناټو په ستاندارد برابرو وسلو سمبال شي .
د افغانستان ددفاع وزارت وياند جنرال ظاهر عظيمي په يوه خبري غونډه کې وويل چې د اردو سرتېرو د شمېر له ډېرېدو سره سم به دغو ځواکونو ته د ناټو پر ستندرد برابرې وسلې او د کارولو په برخه کې به روزنه وويني .ښاغلی عظيمي وايي تر اوسه د ملي اردو ځواکونو ته د نژدې دوه نيم زره زغره والو وسايطو تر څنګ زرګونه ميله سپکه او درنه عصري وسله ورکړل شوي .
په عين حال کې انګيرنې دا دي چې يو شمېر سرتېري په عصري وسلو د بدلېدو سره موافق نه دي او وايي پخوانۍ وسلې تر نويو وسلو ښه کيفيت لري . تر دې مهاله د ملي اردو ډېری سرتېري له روسي وسلو څخه کار اخلي .
د دفاع وزارت وايي د پوځ د دغې نوې پراختيايي پروژې لپاره متحده ايالاتو د شپاړسو ميلياردو ډالرو ژمنه کړې چې د دوی په وينا دغه مرسته کافي نه ده او هيله لري چې د لندن په کنفرانس کې نور هېوادونه هم د مرستو ژمنه وکړي . د ناټو پر ستندرد هغه وسله چې وېشل شوې ياني ام څلور ايم شپاړس سپکې وسلې ، شمېره يې اته څلوېښت زره او يو سل او دېرش ميله ده ، د سرتيرو له ډيرېدو سره هغوی ته ددغو وسلو د ښوونې او روزني لړۍ هم دوام لري . 1145 دستګاوي درنده وسله ويشل شوې . د افغانستان د دفاع وزارت ویاند زیاتوی، زموږ د پخوانيو 122 ملي مترۍ توپونو پر ځای چې ايم سي او ډي سي ول 155 ملۍ مترۍ توپونه چې د ناټو په معيارونو برابر دي او د روسي 82 ملي مترۍ هاوانونو پر ځای د نوي ټکنالوژۍ 81 ملي متري هاوانونه وېشل سوي دي او هيله ده چې د روان کال تر پايه به ډېر شمېر قطعات همدا سي وسلې ولري .