رويټرز: د امريكا د سنا په نوي راپور كې راغلي چې يو وخت د القاعده ډلې مشر اسامه بن لادن په افغانستان كې امريكايي پوځيانو نيولاى شواى، خو دا كار يې ونه كړ.

راپور زياتوي چې د القاعده مشر د تورې بوړې په غرونو كې نيول كېداى شواى، خو امريكايانو دا كار ونه كړ او اوس دوى افسوس كوي، ځكه د نوموړي په تېښته افغانستان ته يو ځل بيا بې ثباتي راغله.

په ۲۰۰۴ كې د امريكا ولسمشريزو ټاكنو ته ډيموكراټ كانديد كيري ويل چې د بوش اداره د القاعده ډلې د مشر په نيولو كې د سپټمبر د ۱۱مې له پېښو يوازې درې مياشتې وروسته پاتې راغله.

راپور تر ډېره د ولسمشر بوش د وخت چارواكو او پوځي مشرانو لكه د دفاع وزير ډونالډ رمسفلډ او پوځي قوماندان ټومي فرانكس ته ګوته نيسي. په رپورټ كې راغلي: ((د جګړې له ډګره د القاعده د مشر لرې كول، د امريكا په ګټه وو او كولاى يې شواى اته كاله مخكې هغه څه پاى ته ورسوي له څه سره چې موږ اوس لاس او ګرېوان يو، اسامه بن لادن د پاكستان پر لور وتښتېدو او لا زيات ترهګر پرې راټول شي)).

رپورټ زياتوي: ((د اسامه د نيولو ناكامي هغه لويه غلطي او د چانس له لاسه وركول وو چې كولاى يې شواى افغانستان او نړۍ د تل لپاره له ترهګرۍ څخه خلاص كړي.))

رپورټ وايي چې اسامه بن لادن د تورې بوړې په غرونو كې اوسېدو او امريكا هغه مهال كولاى شواى د څو زره سرتېرو په استولو دغه سيمه محاصره كړې او دى يې نيولى او يا هم وژلى واى.

د رپورټ په وينا د ۲۰۰۱ كال د دسمبر په ۱۶مه اسامه بن لادن او ساتونكي يې له تورې بوړې راووتل او د پاكستان پر خاوره ورغلل، چې ويل كېږي تر اوسه همالته په سرحدي سيمو كې ژوند كوي.

هغه مهال د امريكا د دفاع وزير ډونالډ رمسفلډ وويل چې دوى ته د اسامه بن لادن مشخص ځاى نه و معلوم كنه دوى به نيولى و او دا يې هم ويل چې دوى د هغوى په هكله بشپړ شواهد نه درلودل.