كابل (ويسا): د پاكستان ځينو رسنيو له اختر مخكې د امريكا او طالبانو تر منځ د خبرو اترو د بهير تفصيلات خپاره كړي دي، مشرق ورځپاڼه د نومبر په ۲۵ مه ګڼه كې په سرليكنه كې ددې خبرو د تفصيل په اړه ليكلي چې زياتې سياسي او مذهبي كړۍ دې خبرو ته حيران دي او د پايلو په اړه يې يو لړ انديښنې او هيلې راپورته شوې دي. دغه خبرې د عبدالله انس په منځګړتوب پيل شوى نوموړى الجزايرى دى د اسامه استاذ او د عبدالله عزام زوم دى. همدا راز په دې خبرو كې د پاكستان د حركت المجاهدين ډلې فضل الرحمن خليل او يو شمير هغه عرب جهادي مشران هم شامل دي چې امريكا يې منځلاري طالبان بولي.
فضل الرحمن خليل په كشمير كې د جهاد قوماندان ؤ چې ډله يې اوس غير قانوني اعلان شوې ده. ددې خبرو پر جريان پاكستان، سعودي عربستان او دنګلاستان هم خبر دي او په يو ډول پكې شريك دي.
د پاكستان ځينې كارپوهان په دې اند دې چې دغه خبرې ددې لپاره دي چې امريكا طالبان د منځنۍ آسيا د طبيعي زيرمو د كنترول لپاره وكاروي، ددوي په اند امريكا غواړى د ازبكستان او تاجكستان د تيلو او غازو د سرچينو ته ځان ورسوي او له همدې لامله اوس پردې خبرې كيږي چې طالبان بايد په سياسي پروسه كې شامل كړاى شي.