نن به د ولسمشرۍ د دوهم پړاو يو نوماند ډاكتر عبد الله خپل دريځ اعلان كړي چې په دوهم پړاو ټاكنو كې سياليو ته درومي او كه پريكون ورسره كوي.

دا زموږ د ولس لپاره په ريښتيا ډيرې برخليك ټاكونكې شېبې دي، مسئاله له اصولي او قانوني بهير سره د يوه تن د ملګرتيا او يا پريكون نه ده، دې ته دامريكا د بهرنيو چارووزيرې هيلري كلنټن هم ځواب ويلى چې كه ډاكتر عبد الله له دوهم پړاو ټاكنو څخه په شا شي هم د دې پروسې مشروعيت به پر ځاى وي، اصلاً ستونزه داده چې زموږ سياستوال د هېواد په اړه د هغو توطيو له درك نه يا ناخبره دي او يا سترګې پرې پټوي چې زموږ د هېواد راتلونكې ګواښي او يا خداى مه كړه په لږ امتياز له همدې توطيو سره تړلي دي.

انتخابات دمرګ او ژوند لوبه نه ده، يوه عادي سياسي پروسه ده چې هر څو كاله وروسته به تكراريږي اوولس به د راتلونكيو څو كلونو لپاره خپل زعامت ټاكي.

له دې ساده پروسې نه ولې د افغان ولس په منځ كې د مخالفتونو كچه تر دښمنيو پورې ورسيږي؟ آخر دې ته څه اړتيا ده د پر دې سر بيره دا اوس چې د پردې تر شا د راتلونكي حكومت او د واكونو او كرسيو پر سر كومې چنې روانې دي په دې كې انتخابات څه شول؟ ولسواكي چيرته ولاړه او د ولس د رايې مفهوم څه دى؟

هغه كسان، كه بهرنيان دي او كه افغانان لږ دې خپل سر ګريوان ته كړي خپل ضمير ته دې ځواب ووايي ځواب يې څه دى؟

آيا تر دې لوى فريب او دوكه شته؟

آيا ولسواكي همدې ته وايي چې د پردې پرمخ دې يوه ډنډوره وي او د پردې تر شا دې بيا په نور څه چنې روانې وي؟

افغان ولس نه دومره ساده دى چې پردې پټو لوبو خبر نه وي چې ولې د دوى رايې دوې مياشتې وروسته بې پايلې اعلان شوې او هغو كورنيو او بهرنيو لوريو چې په دې دوو مياشتو كې د دوهم پړاو خبرې كولې چې كله انتخابات دوهم پړاو ته ولاړل هغوى ټولو ژبې واړولې، نه د پردې تر شا لوبې پايته ورسيدې او نه د يوه قانوني او اصولي بهير په وړاندې د حيلو او چلوټو توپان تم شو.

زموږ د ټولو سياسي لوريو په تيره د ولسمشرۍ دواړو نوماندو دنده ده چې دوى له وړوكو مصلحتونو نه لوړ د هېواد راتلونكې ته په پام سره داسې دريځ غوره كړي چې بيا هيڅ كوم بهرنى او يا كورنى لورى له قانوني او اصولي پروسې پرته د اقتدار تر لاسه كولو په نورو لارو فكر و نه كړي، دغه كرغيړن بهير نور بايد پاى و مومي چې زموږ په هېواد كې كودتايي حكومتونه راځي اويا چا پرديو ته د واك تر لاسه كولو لپاره سترګې نيولې وي.

كه خداى مه كړه دغه شوم تسلسل پاى و نه مومي زموږ د دې روان بهير شامل كدرونه به تاريخ هيڅكله و نه بخښي همدغسې په دې اړه د ولس مسووليت همدغه دى چې بايد د اصولي دريځ تر شا و دريږي او د توطيو ښكار نشي.