ويسا: د ولسمشرۍ د ټاکنو نوماند ډاکټر عبدالله د کمپاين دفتر اعلان وکړ، چې دوى د ټاکنو دويم پړاو نه تحريموي.

 د ډاکټر عبدالله عبدالله د کمپاين د دفتر يو غړي سيد محمد علي رضواني د لړم په ٩ مه ، پژواک خبري اژانس ته وويل، چې دوى پريکړه کړې ده ،چې د ولسشمرۍ د ټاکنو دويم پړاو سره پريكړون نه كوي .

د نوموړي په وينا، دغه پريکړه يې د شنبې په ورځ د يوې غونډې پرمهال کړې ده . هغه  زياته کړه، چې  ناستې پريکړې به سبا د يكشنبي په ورځ د يوې خبري غونډې په ترڅ کې اعلان شي.د ياودنې وړ ده، چې مخکې له دې داسې راپورونه خپاره شوې وو، چې که د ډاکټر عبدالله شرايط ونه منل شي، نو د ټاکنو په دويم پړاو کې به ګډون ونکړي. ډاکټر عبدالله  د لړم په ٤ مه په يوې خبري ناسته کې يو لړ شرايط وړاندې کړل ، چې پکې د ټاکنو د خپلواک کميسيون رييس د لري کولو غوښتنه شوې وه.نوموړي همدرانګه غوښتنه کړې وه، چې چې د کورنيو چارو، معارف او سرحداتو او قبايلو چارو د وزيرانو او د سيمه ييزو ارګانونو د رييس دندې دې د کمپاين پرمهال وځنډول  شي.

عبدالله ويلي و، چې د ټاکنو له دوهم پړاؤ څخه د څار په موخه دې د دوى ٢٠ زره نورو کسانو ته د ټاکنو د خپلواک کمېسيون لخوا کارتونه ورکړل شي او همداراز د ټاکنو په خپلواک کمېسيون کې دې د دوى يوه تن ته له پوره صلاحيت سره واک ورکړل شي، تر څو د هغوى ټولې هلې ځلې وڅاري .

 ډاکټر عبدالله دشنبي  د  ورځې ( د لړم ٩مه) تر پايه ضرب الاجل ورکړى و،  که چيرې د هغه غوښتنې ونه منل شي، دى به د ولسمشرۍ د ټاکنو په دويم پړاو کې د خپل ګډون په اړه پريکړه وکړي. خو د عبدالله دغه غوښتنې  د و لسمشر حامد کرزي لخوا رد شوې وې.د حامدکرزي د کمپاين د دفتر وياند وحيد عمر د ډاکټر عبدالله شرايط او څرګندونې، د ټاکنو د دويم پړاؤ او اساسي قانون د چيلينج کولو په مانا بللي وې .

ويل کيږي چې له دوو ورځو راهيسې د حامد کرزي او ډاکټر عبدالله د کمپاين د دفترونو لخوا خبرې اترې شوې دي ترڅو په دې اړه يوې موافقې ته ورسيږي. همدرانګه راپورونه خپاره شوي چې ډاکټر عبدالله تيره ورځ له ولسمشر حامد کرزي سره ليدلي، خو د هغوى خبرې اترې  له کومې پايلې پرته پاى ته رسيدلي دي.

##