دهېواد د ولسمشريزو ټولټاكنو د دوهم پړاو نيټې ته د ګوتو په شمار ورځې پاتې دي، خو له يوه پلوه د دې پړاو د يوه نوماند ډاكتر عبدالله لخوا، ناڅرګند دريځ نيول او بل لوري ته د ژمي، امنيتي ستونزو او درغليو د امكان ګونګوسو افغان ولس په دوه لارې كې درولى دى، دغه حالت هيڅكله هم نه د افغان ولس په ګټه دى او نه د افغانستان په سياست او  وضعيت كې ښكليو لوريو ته څه ګټه رسولاى شي.

پردې ستونزو د پاسه كله چې د انتخاباتو خپلواك كميسيون د يو سل او پنځوسو انتخاباتي حوزو د پرانيستلو اعلان وكړ چې دا د افغان ولس مسلم حق دى د يوناما د مامورينو شونډې پرې ځړيدلې دي چې ګواكي د دوى د مامورينو مورال پرې لويږي! دلته له ورايه ښكاري چې د عام ولس پر ځاى هر لورى د خپلې ګټې په فكر كې دى، په ملي كچه د ستونزې په باب فكر نه كېږي. يوناما غواړي چې د دوى دنازوليو مامورينو د بشپړ مصونيت په حدودو كې پر انتخاباتو فكر وشي. كه افغانستان تر نيمايي زيات ولس د رايې او انتخاب له حق نه محروميږي هم د دوى يې څه؟

ډاكتر عبد الله د دوهم پړاو انتخاباتو له اعلان سره دومره نيشه شو چې د قانون پر خلاف د وزيرانو د تعليق شرطونه وړاندې كوي. دا ټول په واقعيت كې هغه څه دي چې د افغان دولت مخالفينو غوښتل او كه دغه هر څه دلته عملي كېږي په يوه معنا د دولت مخالفو لوريو ته ټول يو امتياز وركوو، ځكه چې د ولسواكۍ د بهير مختل كيدل او بيا خبره له صفر نه پيلول په همدې معنا دي.

په هر صورت موږ دا نه وايو چې يو ناكام او بد نام بهير بايد دوام و مومي. خو له صفر نه پيلول اصلاً د همدغه ناكام بهير د بيا دوام په معنا دى، تر دې دا ډيره آسانه ده چې د راتلونكې لپاره په همدې روان بهير كې هغه سمون را شي چې ملت يې غواړي.

په افغانستان كې د تيرو اتو كلونو د ناكاميو او ستونزو تر ټولو ستر لامل داؤ چې زموږ پر هېواد د انتخابي نظام په نامه هم يو مصلحتي داسې نظام تپل شوى ؤ چې د ولس او خلكو پر ځاى د څو تنو او يا بهرنيو لوريو ګټې پكې پالل كيدې.

زموږ ولس څه چې د نړۍ په هر ولس او هېواد كې يوازې داسې يو نظام او حكومت د ولس د خدمت جوګه كيداى شي چې د يوه ټيم او هدافو خاوند وي، واكمن پكې د شرعي الولامر حيثيت ولري او نور يې په اطاعت او حكم منلو مكلف وي.

اوس چې د انتخاباتو د دوهم پړاو په وړاندې پر بيلابيلو خولو د ډول ډول ننګونو زمزمې كېږي خداى دې وكړي چې دا د يوې پليدې معاملې برخه نه وي چې د څو كاله وړاندې پراخ بنسټه حكومت له نظر يې پيل او اوس د ائتلافي او ملي وحدت! حكومت په نامه بيا پر ځينو خولو د هغو يادونه كېږي.