(كابل+نيويارك): په افغانستان كې د امريكايي پوځيانو قوماندان مک كریسټل وايي چې په افغانستان کې امنيتي وضع خرابه ده، خو موږ بشپړ نا هيلي شوي نه يو، يوازې ستراتيژيكو بدلونونو ته اړتيا ده.

په افغانستان کې د امریکايي او ناټو د عسکرو قومندان پر ستراتیژۍ باندې له سره کتنه چې له ډیر وخت راهیسې یې تمه کېدله، بشپړه کړې او نتیجه یې د امریکا او ناټو چارواکو ته ورکړې ده.

د امریکا جمهور رئیس براک اوباما په افغانستان او پاکستان کې د امریکا پر ستراتیژۍ له سره کتنې امر کړى و چې په دغه سیمه کې د طالبانو او القاعدې د زیاتېدونکي نفوذ پر خلاف مبارزه وشي.

څو ورځې مخکې د امریکا د وسله والو قواوو تر ټولو لوړپوړه قوماندان ستر جنرال مایک مولن هم وویل په افغانستان کې وضعه خرابه ده او نوره هم مخ په خرابیدو روانه ده.

تیره اونۍ نیویارک ټایمز ورځپاڼې رپورټ خپور کړ چې په په افغانستان کې د ناټو په ماموریت کې شاملو امریکايي قومندانانو اندېښنه ښودلې چې د خپل ماموریت د سر ته رسولو لپاره کافي پوځيان نه لري.

ورځپاڼې د چا نوم نه دی اخیستی خو لیکلي یې دي چې دغو قومندانانو سیمې ته د امریکا د خاص استازي ریچارډ هالبروک سره په وروستیو غونډو کې ټینگار کړی چې نورو عسکرو ته ضرورت لري او په سيمه كې د امريكا په ستراتيژۍ بايد له سره غور وشي.