Posted by جلال اباد : د جلال اباد ښار په تالاشۍ څلور لاري کې ديوې چاودنې له امله يو ماشوم وژل شوى او دوه نور ټپيان شوي دي.
دا چاودنه نن د زمري په ١٥مه، تر غرمې مخکې په شاوخوا ١٠:٤٥ بجو په سيمه کې د پوليسو پر يوه رېنجر وشوه.
عيني شاهدان وايي، چې چاودنه ديوه چسپکي ماين له امله شوې ، چې د پوليسو پر رېنجر موټر پورې نښلول شوى و.
د ذبيح الله په نامه يوه عيني شاهد وایی ، څنګه چې رېنجر څلور لاري ته ورسېد، نو ناڅاپه يې په شا ته برخه کې چاودنه وشوه.
د هغه په وينا، د چاودنې له امله د رېنجر شاتنۍ برخه زيانمنه شوې، خو پکې ناستو پوليسو ته مرګ ژوبله نه ده اوښتې .
دى وايي ، چې په سيمه کې روان يو لس کلن ماشوم ځاى پر ځاى ووژل شو او درې نور کسان ټپيان شوي دي.
د ننګرهار د والي وياند احمد ضياء عبدالزي وایی چې په پېښه هغه ماشوم وژل شوى چې د اختر سودا اخيستو په موخه ښار ته راغلى و او دوه نور ژوبل دي.
ددې چاودنې مسووليت تر اوسه چا پر غاړه نه دى اخيستى.
د يادونې ده ، چې څو ورځې مخکې هم په جلال اباد ښار کې د چاودنې له امله ٩ عام وګړي ووژل شول او تر ٢٢ پورې ټپيان شوي وو.