Posted by واشنګټن : مدافع وکيلانو ويلي، هغه امريکايى سرتېرى د خپل جرم منلو ته تيار شوى، چې په کندهار کې يې ١٦ افغانان وژلي وو.
د رابرټ بېلز په نوم دغه امريکايي سرتېري د ١٣٩٠ لمريز کال د کب مياشتې په وروستيو کې (٢٠ مارچ ٢٠١٢) د کندهار د پنجوايي ولسوالۍ د زنګ اباد سيمې د الکوزو او نجيبيانو د کليو پر درېيو کورونو بريدونه وکړل، چې د ښځو او ماشومانو په ګډون يې ١٦ عام وګړي ووژل او پنځه نور يې ټپيان کړل.
تر دې پېښې وروسته بېلز امريکا ته ولېږدول شو او اوس د واشنګټن په يوه پوځي محکمه کې تر محاکمې لاندې دى.
د رابرټ بېلز وکيلانو پرون په واشنګټن کې ويلي، چې راتلونکې اونۍ د سې شنبې ورځ (د غبرګولي ١٤مه) به نوموړى د قاضيانو پر وړاندې د خپل جرم اعتراف وکړي.
دا په داسې حال کې ده، چې د وژل شوو افغانانو کورنيو ويلي وو، چې که نوموړي ته د مرګ سزا ورنه کړل شي، نو دوى به يې په بدل کې ١٠٠ امريکايان ووژني.
د وژل شوو کسانو د کورنۍ يوه غړي اى پي ته ويلي، چې بېلز ته د بند سزا دوى ته د منلو وړ نه ده. سرچينې زياته کړې: ((زه پوهېږم، چې ما سره قوت نشته، خو که قوت ترلاسه کړم، نو بېلز به اعدام کړم.))
د رابرټ بېلز وکيلانو ويلي، چې دى پر يادو وژنو پښېمانه دى خو په دې اړه يې نور جزئيات نه دي ورکړي، چې هغه به د محکمې پر مهال قاضيانو ته نور څه وايي.
د جان هنري براون په نوم يوه وکيل رسنيو ته ويلي، چې بېلز د بريد پر شپه زړه ماتى او د جنون په حالت کې و.
دا به راتلونکې اونۍ معلومه شي، چې قاضيان بېلز ته څه ډول سزا ورکوي، خو په تېرو ٥٠ کلونو کې کوم امريکايي سرتېري ته د اعدام سزا نه ده ورکړل شوې.