د پاكستان د علماؤ د يوه مشر دغه فتوا چې په افغانستان كې ځانمرګي بريدونه روا وبولي واقعاً  د اسلام د مبارك دين له روح سره منافي ده، فتوا بيا د نفس او يا نفسونو د وژلو فتوا داسې آسانه نه ده چې هر څوك يې صادره كړاى شي.

دا چې په افغانستان كې بهرني پوځونه پراته دي، دغه پوځونه كه د ځانمرګيو بريدونو د روا والي دليل وي بيا  خو د پاكستان په شمول ښايي نږدې په ټولو اسلامي هېوادونو كې دغسې بريدونه روا وي، بيا يوازې د افغانستان، فلسطين او كشمير استثنا د څه لپاره ده؟

د فتوا ځواب د شريعت له مخې د هغه عالم دنده ده چې د مفتي درجې ته رسيدلى وي او له نيكه مرغه افغانستان زيات شمير داسې علما لري، هغوى د پاكستان د استخباراتو د مفتي ځواب هم ويلى دى.

د افغانستان د روانې بدمرغې جګړې په اړه په زغرده ويلاى شو چې دا د امريكا جګړه ده، د امريكا د اهدافو  لپاره ده، خو تر ټولو ستره وسيله يې د جګړې په دوام او د انګيزو په راپيدا كولو كې متاسفانه د پاكستان استخباراتي ادارې دي، دا امر يكايي جګړه ده چې د  جواز فتواوې يې آى اس آى وركوي.

دا چې نن په افغانستان او سيمه كې د امريكا او ناټو غوبل جوړ دى اصلي لامل يې د سيمې د استخباراتو همدغه جفا ده چې افغان ولس يې آرام پرېنښود، دلته يې بدمرغيو او جګړو ته لمن ووهله او لا هم لګيا دي دې بدمرغيو ته د دوام لپاره په نويو طرحو كار كوي.

دغه استخباراتي لوبغاړي ظاهراً برلاسي او بريالي هم دي، په سيمه او افغانستان كې د سولې په مخه كې هر ډول خنډونه ايجادولاى شي، د ړندو فتواو مفتيان يې هم په واك كې دي.

خو كه د لوبې تل ته ځېر شو، دې ته پام وكړو چې په ټوله كې وضعه پر كوم لور روانه ده همدغه لوري چې ظاهراً د يوه پياوړي او ځواكمن پاكستان رجزونه تكراروي د خپل مسلمان ولس له ژوند سره هم لوبې كوي، دا نن چې پخپله په پاكستان كې د  مرګونو كومه څپه راپورته ده دا د همدغه كړيو د ناروا او  خاينانه طرحو يو طبيعي غبرګون او پايلې دي.

هغه د شاعر خبره چې:

زموږ كيښتۍ يې ډوبولې خپل درياب يې توپاني شو.

پاكستان د خپلو وطن پلورو او پردي پالو چارواكيو د غلطو او  ناروا پريكړو په اور كې سوځي او زموږ باور دى چې د مظلوم افغان مجاهد افغان او هغه سرلوړي ولس آزار ورپسې وي چې ټولې نړۍ ته يې له استكباري ځواكونو سره د مقابلې او جهاد لاره وښودله هېڅكله به ښه ورځ ونه ويني.

د اسلامي امت له علماؤ نه د افغان ولس هيله او غوښتنه دا ده چې د روانو فتنو په اړه خپل دروند مسووليت ادا كړي او پرنيږدي چې عزيز اسلام چې بشر ته د رحمت سيورى دى د داسې ذليلو سياسي ګوډيو له لاسه بدنام شي.