Posted by لښکرګاه : چارواکي وايي، چې په هلمندکې په روان ١٣٩١ لمريز کال کې په بېلابېلو امنيتي پېښو کې ١١٧٠ وژل شوي، چې ډېر په کې وسلوال مخالفين دي.
دغه يو کلن راپور د دې ولايت امنيه قوماندان سمونوال عبدالنبي الهام د يوې خبري ناستې پر مهال تېره ورځ ناوخته خبريالانو ته څرګند کړ.
د هغه په وينا، په وژل شوو کسانو کې ٣٦٠ ملکي وګړي دي، ٣٨ پوليس او پاتې ٧٦٣ د دولت وسلوال مخالفين دي، چې په بېلابېلو عملياتوکې وژل شوي دي.
نوموړي زياته کړه، چې ملکي وګړو او پوليسو ته ډېره مرګ ژوبله د دې ولايت په بېلابېلو ولسواليو کې د سړک غاړي ماينونو د چاودنې له امله اوښتى، چې د وسلوالو طالبانو له خوا ځاى پرځاى شوي وو.
امنيه قوماندان دغه راز وويل، په همدې پېښو کې ٥٤١ تنه ملکي وګړي او ١٣٨ وسلوال طالبان ټپيان شوي او ٢٤٥ تنه مخالفين ژوندي نيول شوي دي.
نوموړي وويل: ((دا چې پوليس مسلکي شوي دي، له دې امله يې د نورو کلونو په پرتله لاس ته راړوني ډېرې دي، تر درې زره زيات ماينونه يې شنډ کړي، ١٠٨ موټر سايکلونه ،اته موټر او تر ٢٠٠ ميله زياتې وسلي يې نيولي دي.))
د هغه په وينا، په جنايي پېښو کې هم کمښت راغلى دى او هغه کسان، چې په جرمونو تورن پېژندل شوي دي، ټول عدلي ارګانونو ته سپارل شوي دي.
وسلوالو طالبانو د دې راپور په اړه تراوسه څه نه دي ويلي، خو د دوى د ډلې وياندويانو د روان کال په اوږدو کې د زيات شمېر کورنيو او بهرنيو سرتېرو د وژلو راپورونه ورکړي دي.