کابل:-  جمهوررئیس حامدکرزي د یو لړ تشریفاتي مراسمو په ترڅ کې د استرالیا د نوي سفیر ښاغلي جان فیلف باورلیک ومانه.

د باورلیک د وړاندې کولو له مراسمو وروسته چې نن غرمې مخکې په ارګ کې ترسره شول، د هېواد جمهوررئیس او د افغانستان لپاره د استرالیا نوي سفیر جان فیلف په بېلابیلو برخوکې د دواړو هېوادونو ترمنځ د اړیکو پر پراختیا خبرې وکړې.

حامدکرزي په تېرو کلونو کې د استرالیا د حکومت او خلکو د مرستو له امله د افغانستان د خلکو په استازیتوب مننه وکړه او د دغه هېواد له نوي سفیر څخه یې غوښتل چې استرالیا دې د پوهنې او لوړو زده کړو په برخوکې له افغانستان سره خپلې همکارۍ پراخې کړي.

د استرالیا نوي سفیر د هغه هېواد د صدراعظمې نیکې هیلې او سلامونه حامدکرزي ته و رسول او د هغې لخوا یې دا ډاډ څرګند کړ چې استرالیا به د اوږد مهال لپاره د افغانستان له خلکو سره خپلو مرستو او همکاریو ته دوام ورکړي.

ښاغلي جان فیلف د حامدکرزي لخوا د پوهنې او لوړو زده کړو په برخوکې د همکارۍ له غوښتنې څخه خوښي څرګنده کړه، وې ویل چې دغه همکاري په افغانستان کې د استرالیا د ماموریت یوه مهمه برخه ده چې په ښه ډول به دوام ومومي.

ده، ډاډ څرګند کړ چې په افغانستان کې د خپل ماموریت په لړکې به هڅه وکړي چې د دواړو هېوادونو ترمنځ اړیکې لا پراختیا ومومي.

په دغو مراسمو کې د بهرنیو چارو وزارت سیاسي معین او د دغه وزارت د تشریفاتو رئیس هم حضور درلود.